ഓട്ടവ, മാർച്ച് 7, 2025 – കുടുംബ പുനഃസമാഗമം കാനഡയുടെ കുടിയേറ്റ സമ്പ്രദായത്തിന്റെ ഒരു പ്രധാന ഘടകമാണ്. കനേഡിയൻ പൗരന്മാർക്കും സ്ഥിര താമസക്കാർക്കും അവരുടെ പ്രിയപ്പെട്ടവരെ കാനഡയിൽ താമസിക്കാനും ജോലി ചെയ്യാനും സ്പോൺസർ ചെയ്യാൻ ഈ സംവിധാനം സഹായിക്കുന്നു. പേരെൻറ് ഗ്രാൻഡ് പേരെൻറ് (PGP) പ്രോഗ്രാമിലൂടെ, കഴിയുന്നത്ര കുടുംബങ്ങളെ ഒന്നിപ്പിക്കുക എന്നതാണ് ഈ പ്രോഗ്രാം ലക്ഷ്യമിടുന്നത്.
ഈ വർഷം, ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) PGP പരിപാടിയിൽ സ്പോൺസർഷിപ്പിനായി 10,000 അപേക്ഷകൾ ആണ് സ്വീകരിക്കുന്നത്.
2020- ൽ സ്പോൺസർ ചെയ്യാൻ താൽപ്പര്യം പ്രകടിപ്പിച്ച് സമർപ്പിക്കപ്പെട്ട അപേക്ഷകളുടെ പൂൾ ശേഷിക്കുന്നതിനാൽ, പുതിയ ഫോമുകൾ സ്വീകരിക്കുന്നതിന് പകരം ആ പൂളിൽ നിന്ന് ക്രമരഹിതമായി (randomly) തിരഞ്ഞെടുക്കപ്പെടുന്ന സ്പോൺസർമാർക്ക് അപേക്ഷിക്കാനുള്ള ക്ഷണം അയക്കാൻ IRCC പദ്ധതിയിടുന്നു. 2020 മുതൽ 2024 വരെ നടത്തിയ ഇൻടേക്കുകൾക്ക് സമാനമായ സമീപനമാണ് ഇതും.
2025 ഫെബ്രുവരി 5 വരെയുള്ള കണക്കനുസരിച്ച്, ക്യൂബെക്കിന് പുറമേയുള്ള പ്രവിശ്യകളിലേക്കുള്ള അപേക്ഷകൾക്ക് ഏകദേശം 24 മാസവും ക്യൂബെക്കിലേക്കുള്ളവർക്ക് 48 മാസവുമാണ് പ്രോസസ്സിംഗ് സമയം. ക്യൂബെക്കിന്റെ കുടുംബ വിഭാഗത്തിലെ പരിമിതമായ പ്രവേശന പരിധി കാരണമാണ് ഈ വ്യത്യാസം.
അപേക്ഷകരുടെ കാത്തിരിപ്പ് സമയം കുറയ്ക്കാൻ, PGP പരിപാടിയിലെ അപേക്ഷകളുടെ എണ്ണവും ഭാവി വർഷങ്ങളിലെ ഇമിഗ്രേഷൻ ലെവൽ പ്ലാനിൽ ലഭ്യമായ PGP സ്ഥലങ്ങളും തമ്മിൽ സന്തുലനം നിലനിർത്താൻ IRCC ശ്രമിച്ച് വരുന്നു. 2025-2027 ഇമിഗ്രേഷൻ ലെവൽ പ്ലാനിൽ ആകെയുള്ള കുടിയേറ്റ പരിധി കുറച്ചതുപോലുള്ള മാറ്റങ്ങൾ, പുതിയ അപേക്ഷകൾ സ്വീകരിക്കുന്നതിന്റെ എണ്ണം പുനർനിർണയിക്കാൻ IRCC-യെ പ്രേരിപ്പിക്കുന്നു.
സ്പോൺസർ ചെയ്യാനുള്ള താൽപ്പര്യ(Expression of Interest) ഫോം സമർപ്പിക്കാൻ അവസരം ലഭിക്കാത്ത കുടുംബങ്ങളെ ഈ സമീപനം ബാധിക്കുമെന്ന് IRCC-ക്ക് അറിയാം. എന്നാൽ, മാതാപിതാക്കളെയും മുത്തശ്ശിമാരെയും ദീർഘനാളത്തേക്ക് ഒന്നിപ്പിക്കാൻ ആഗ്രഹിക്കുന്നവർക്ക് സൂപ്പർ വിസ എന്ന ഓപ്ഷൻ ഇപ്പോഴും ലഭ്യമാണ്. ഇത് മാതാപിതാക്കൾക്കും മുത്തശ്ശിമാർക്കും അവരുടെ മക്കളെയോ പേരമക്കളെയോ ഒരു സന്ദർശനത്തിൽ 5 വർഷം വരെ കാനഡയിൽ തങ്ങാൻ അനുവദിക്കുകയും 10 വർഷത്തേക്ക് കാനഡയിലേക്ക് ഒന്നിലധികം പ്രവേശനങ്ങൾ നൽകുകയും ചെയ്യുന്നു. സൂപ്പർ വിസ ലഭ്യത കൂടുതൽ എളുപ്പമാക്കാൻ IRCC അടുത്തിടെ ആരോഗ്യ ഇൻഷുറൻസ് ആവശ്യകതയിൽ മാറ്റം വരുത്തിയിട്ടുണ്ട്.
2025-ലെ PGP പരിപാടി ഇൻടേക്കിനെക്കുറിച്ചുള്ള കൂടുതൽ വിശദാംശങ്ങൾ വരും മാസങ്ങളിൽ ലഭ്യമാകും. അപേക്ഷിക്കാനുള്ള ക്ഷണങ്ങൾ എപ്പോൾ അയക്കുമെന്നതുൾപ്പെടെയുള്ള വിവരങ്ങൾ അതിൽ ലഭ്യമാകും.
