പ്രിൻസ് ആൽബർട്ട്, കാനഡ: കാനഡയിലെ സസ്‌കാച്ച്വാൻ പ്രവിശ്യയിൽ വ്യാപകമായ കാട്ടുതീയെ തുടർന്ന് പ്രവിശ്യാവ്യാപക അടിയന്തരാവസ്ഥ പ്രഖ്യാപിച്ചു. മെയ് 29, 2025 വ്യാഴാഴ്ച, പ്രവിശ്യാ പ്രീമിയർ സ്കോട്ട് മോ നടത്തിയ പ്രസ് കോൺഫറൻസിൽ, വടക്കൻ സസ്‌കാച്ചവാനിലെ കാട്ടുതീ സാഹചര്യങ്ങൾ “അതീവ ഗുരുതരവും” ഇതിനു മുമ്പ് കണ്ടിട്ടില്ലാത്തവിധം വഷളായിരിക്കുകയാണെന്നും വ്യക്തമാക്കി.
സസ്‌കാച്വാൻ പബ്ലിക് സേഫ്റ്റി ഏജൻസി (SPSA) റിപ്പോർട്ട് അനുസരിച്ച്, മെയ് 29 വ്യാഴാഴ്ച വൈകുന്നേരം വരെ 17 സജീവ കാട്ടുതീവ്യാപന സംഭവങ്ങൾ ഉണ്ടായി. അതിൽ എട്ടെണ്ണം നിയന്ത്രണാതീതമാണ്. പ്രത്യേകിച്ച്, പെലിക്കൻ നാരോസിന് സമീപമുള്ള 850 ഹെക്ടർ വിസ്തൃതിയുള്ള പ്രദേശത്തെ കാട്ടുതീ, ജനവാസ കേന്ദ്രങ്ങൾക്ക് ഭീഷണിയായി മാറിയിരിക്കുകയാണ്. കാംപ് ആൻഡ് ഷൂ എന്നീ പ്രദേശങ്ങളിൽ 216,000 ഹെക്ടർ വിസ്തൃതിയിൽ പടർന്ന തീ ലോവർ ഫിഷിംഗ് ലേക്കിനും ക്യാൻഡിൽ ലേക്കിനും സമീപം വൻതോതിൽ പുകപടലങ്ങൾ ഉയർത്തിയിട്ടുണ്ട്.
ഒഴിപ്പിക്കൽ ഉത്തരവുകൾ
വടക്കൻ സസ്‌കാച്വാനിലെ 8,300-ലധികം ആളുകൾ ഒഴിപ്പിക്കൽ ഉത്തരവിന്റെ കീഴിലാണ്. പെലിക്കൻ നാരോസിൽ നിന്ന് 2,100-ലധികം പേർ, ഹാൾ ലേക്കിൽ നിന്ന് 380-ലധികം പേർ, ബ്രബന്റ് ലേക്ക്, ലിറ്റിൽ ബെയർ ലേക്ക്, ഈസ്റ്റ് ട്രൗട്ട് ലേക്ക് എന്നിവിടങ്ങളിൽ നിന്നുള്ളവരും ഒഴിപ്പിക്കപ്പെട്ടിട്ടുണ്ട്. ക്യാൻഡിൽ ലേക്ക്, ക്രെയ്റ്റൺ എന്നിവിടങ്ങളിൽ സ്വമേധയാ ഒഴിപ്പിക്കൽ മുന്നറിയിപ്പുകൾ നൽകിയിട്ടുണ്ട്. ലാക് ലാ റോഞ്ച് ഇന്ത്യൻ ബാൻഡ്, പീറ്റർ ബല്ലന്റൈൻ ക്രീ നേഷൻ, മോൺട്രിയോൾ ലേക്ക് ക്രീ നേഷൻ എന്നീ മൂന്ന് ഫസ്റ്റ് നേഷനുകൾ സംയുക്തമായി പ്രാദേശിക അടിയന്തരാവസ്ഥ പ്രഖ്യാപിച്ച് വാട്ടർ ബോംബറുകൾ, വ്യോമ പിന്തുണ, അടിയന്തര താമസ സൗകര്യങ്ങൾ എന്നിവ ആവശ്യപ്പെട്ടിട്ടുണ്ട്.
പ്രീമിയർ സ്കോട്ട് മോയുടെ പ്രസ്താവനയനുസരിച്ച്, 14 ദിവസത്തേക്കാണ് അടിയന്തരാവസ്ഥ പ്രഖ്യാപിച്ചിരിക്കുന്നത്. എന്നാൽ, ആവശ്യമെങ്കിൽ ഇത് 30 ദിവസം വരെ നീട്ടാവുന്നതാണ്. വിശ്രമമില്ലാതെ പ്രവർത്തിക്കുന്ന അഗ്നിശമന സേനാംഗങ്ങൾക്ക് പിന്തുണ നൽകാൻ പരിശീലനം ലഭിച്ച വൈൽഡ്‌ലാൻഡ് ഫയർഫൈറ്റർമാരോട് പ്രാദേശിക ഫയർ ബേസുകളിൽ റിപ്പോർട്ട് ചെയ്യാൻ അദ്ദേഹം ആവശ്യപ്പെട്ടു.
വെല്ലുവിളിയാകുന്ന കാലാവസ്ഥ
വരൾച്ചയും ഉയർന്ന താപനിലയും കാട്ടുതീയുടെ തീവ്രത വർധിപ്പിക്കുന്നതായി SPSA റിപ്പോർട്ട് ചെയ്യുന്നു. അടുത്ത ദിവസങ്ങളിൽ മഴയ്ക്ക് സാധ്യതയില്ലാത്തതിനാൽ, തീ നിയന്ത്രിക്കാൻ കൂടുതൽ വെല്ലുവിളികൾ നേരിടേണ്ടിവരും. ഈസ്റ്റ് ട്രൗട്ട് ലേക്കിൽ “ഗണ്യമായ നാശനഷ്ടം” റിപ്പോർട്ട് ചെയ്തിട്ടുണ്ട്, ലിറ്റിൽ ബെയർ ലേക്കിന് ഒരു കിലോമീറ്റർ അകലെ തീ എത്തിയിട്ടുണ്ട്.
സമീപ പ്രവിശ്യകളിലെ സ്ഥിതി
മനിറ്റോബയിലെ ഫ്ലിൻ ഫ്ലോണിൽ ഉൾപ്പെടെ 17,000-ലധികം ആളുകൾ ഒഴിപ്പിക്കപ്പെട്ടു. ആൽബെർട്ടയിലും ഉത്ഭവിച്ച 40 അഗ്നിബാധകളിൽ 3 എണ്ണം ജനങ്ങൾക്ക് ഭീഷണിയാകുന്ന തരത്തിൽ വ്യാപിക്കുന്നതായാണ് റിപ്പോർട്ടുകൾ. ലാ റോഞ്ചിലെ JRMCC അരീനയിൽ പുക മൂലമുള്ള വായു മലിനീകരണത്തിൽ നിന്ന് രക്ഷപ്പെടാൻ ഫ്രെഷ് എയർ ഷെൽട്ടർ തുറന്നിട്ടുണ്ട്. കനേഡിയൻ റെഡ് ക്രോസ് ഒഴിപ്പിക്കപ്പെട്ടവർക്ക് പിന്തുണ നൽകുന്നുണ്ട്.
തുടരുന്ന ആശങ്കകൾ
“ഇത് ഒരു ടിന്റർബോക്സ് പോലെയാണ്,” SPSA പ്രസിഡന്റ് മാർലോ പ്രിച്ചാർഡ് പറഞ്ഞു. “മഴ ലഭിക്കാതെ, സ്ഥിതി കൂടുതൽ വഷളാകാൻ സാധ്യതയുണ്ട്.” പ്രവിശ്യയിൽ 2025-ൽ ഇതുവരെ 205 കാട്ടുതീകൾ റിപ്പോർട്ട് ചെയ്തിട്ടുണ്ട്, ഇത് 5 വർഷത്തെ ശരാശരിയായ 124-നെക്കാൾ വളരെ കൂടുതലാണ്.
സസ്‌കാച്ചവാനിലെ ജനങ്ങൾക്ക് ഈ പ്രതിസന്ധി ഘട്ടത്തിൽ ഐക്യവും ജാഗ്രതയും ആവശ്യമാണ്. കൂടുതൽ വിവരങ്ങൾക്ക് SPSA-യുടെ ഔദ്യോഗിക വെബ്സൈറ്റ് പരിശോധിക്കുക.
https://www.saskpublicsafety.ca
