ടൊറോന്റോ: ഒന്റാറിയോ പ്രീമിയർ ഡഗ് ഫോർഡ് കാനഡയിൽ കാസിൽ ഡോക്ട്രിൻ നിയമങ്ങൾ (Castle Law) നടപ്പിലാക്കണമെന്ന് ആവശ്യപ്പെട്ട് രംഗത്തെത്തി. വീട്ടുടമകൾക്ക് സ്വയം പ്രതിരോധത്തിന് കൂടുതൽ അധികാരം നൽകുന്ന നിയമമാണ് കാസിൽ ഡോക്ട്രിൻ. ഇക്കഴിഞ്ഞ ദിവസം നടന്ന വോൺ (Vaughan) ഷൂട്ടിംഗ് സംഭവത്തിന്റെ പശ്ചാത്തലത്തിലാണ് ഫോർഡിന്റെ ഈ ആഹ്വാനം. കഴിഞ്ഞ ആഴ്ച വോണിൽ ഒരു വീട്ടുടമ കാർ മോഷ്ടാക്കളെ ഭയപ്പെടുത്താൻ വെടിയുതിർത്തതിന് വീട്ടുടമക്കെതിരെ കുറ്റം ചുമത്തിയിരുന്നു. ഈ വീട്ടുടമയെ ശിക്ഷിക്കുന്നതിനുപകരം അവർക്ക് മെഡൽ നൽകണമെന്നാണ് ഫോർഡ് അഭിപ്രായപ്പെട്ടത്.
ഫോർഡിന്റെ അഭിപ്രായത്തിൽ “അമേരിക്കയിലേതുപോലെ നമുക്കും കാസിൽ നിയമം വേണം, നമ്മുടെ നീതിന്യായ വ്യവസ്ഥ ദുർബലമാണ്. വീട്ടിൽ അതിക്രമിച്ച് കയറുന്നവർക്കെതിരെ വീട്ടുടമകൾക്ക് സ്വന്തം സുരക്ഷയ്ക്കായി നടപടിയെടുക്കാൻ അവകാശം ഉണ്ടായിരിക്കണം.”
കാസിൽ ഡോക്ട്രിൻ, അമേരിക്കൻ ഐക്യനാടുകളിലെ ചില സംസ്ഥാനങ്ങളിൽ നിലവിലുള്ള ഒരു നിയമമാണ്. ഇത് വീട്ടുടമകൾക്ക്, തങ്ങളുടെ വസതിയിൽ അനധികൃതമായി പ്രവേശിക്കുന്നവർക്കെതിരെ, പ്രതിരോധിക്കാൻ അനുമതി നൽകുന്നു. എന്നാൽ, കാനഡയിലെ നിലവിലെ നിയമങ്ങൾ ഇത്തരം സാഹചര്യങ്ങളിൽ കർശനമായ നിയന്ത്രണങ്ങൾ ഏർപ്പെടുത്തുന്നുണ്ട്, പ്രത്യേകിച്ച് ആയുധങ്ങളുടെ ഉപയോഗം സംബന്ധിച്ച്.
ഫോർഡിന്റെ പ്രസ്താവന സാമൂഹ്യമാധ്യമങ്ങളിൽ വലിയ ചർച്ചയ്ക്ക് വഴിയൊരുക്കിയിട്ടുണ്ട്. “പ്രീമിയർ ഡഗ് ഫോർഡ് കാനഡയുടെ ദുർബലമായ നീതിന്യായ വ്യവസ്ഥയെ വിമർശിക്കുകയും കാസിൽ നിയമം വേണമെന്ന് ആവശ്യപ്പെടുകയും ചെയ്തു.” എന്നാണ് @TPostMillennial എന്ന എക്സ് ഉപയോക്താവ് ഫോർഡിന്റെ പ്രസ്താവനയെ പിന്തുണച്ച് പോസ്റ്റ് ചെയ്തത്.
എന്നാൽ, ഈ നിർദ്ദേശം വിവാദങ്ങൾക്കും വഴിവെച്ചിട്ടുണ്ട്. കാനഡയിലെ നിയമവ്യവസ്ഥയിൽ അമേരിക്കൻ മാതൃകയിലുള്ള നിയമങ്ങൾ കൊണ്ടുവരുന്നത് അപകടകരമാണെന്ന് വിമർശകർ ചൂണ്ടിക്കാട്ടുന്നു. കനേഡിയൻ സിവിൽ ലിബർട്ടീസ് അസോസിയേഷന്റെ ഡയറക്ടർ ഷാക്കിർ റഹീം, ഫോർഡിന്റെ നിലപാടിനെ “ആശങ്കാജനകം” എന്ന് വിശേഷിപ്പിച്ചു. അദ്ദേഹത്തിന്റെ അഭിപ്രായത്തിൽ “നീതിന്യായ വ്യവസ്ഥയുടെ സ്വാതന്ത്ര്യവും നിയമവാഴ്ചയും ഉറപ്പാക്കേണ്ടത് അനിവാര്യമാണ്,”
ഒന്റാറിയോയിലെ പ്രതിപക്ഷ നേതാവ് മാരിറ്റ് സ്റ്റൈൽസ്, ഫോർഡിന്റെ അഭിപ്രായങ്ങളെ “അൺ-കനേഡിയൻ” എന്നാണ് വിമർശിച്ച് വിശേഷിപ്പിച്ചത്. “അമേരിക്കൻ ശൈലിയിലുള്ള രാഷ്ട്രീയം കാനഡയുടെ നീതിന്യായ വ്യവസ്ഥയിലേക്ക് കൊണ്ടുവരുന്നത് അംഗീകരിക്കാനാവില്ല,” അവർ എക്സിൽ കുറിച്ചു.
ഈ വിഷയത്തിൽ കൂടുതൽ ചർച്ചകൾക്കും നിയമനിർമാണ നീക്കങ്ങൾക്കും വഴിയൊരുക്കുമെന്നാണ് വിലയിരുത്തൽ. ഫോർഡിന്റെ നിർദ്ദേശം കാനഡയിലെ സ്വയം പ്രതിരോധ നിയമങ്ങളിൽ വലിയ മാറ്റങ്ങൾക്ക് കാരണമാകുമോ എന്ന് കാത്തിരുന്ന് കാണേണ്ടതുണ്ട്.
