വായനശീലം കുട്ടികളിൽ

കുടുംബവുമായുള്ള ഒരു കാർ യാത്രയിൽ മറീന ഞങ്ങളുടെ മകൻ നിഖിലിനോട് ചോദിച്ചു, “നീ എങ്ങനെയാണ് വായനശീലം വളർത്തിയത്?”

നിഖിൽ കിൻഡർഗാർട്ടനിൽ പഠിക്കുമ്പോൾ മറീന കാനഡയ്ക്ക് കുടിയേറി. അവനെ ഒന്നാം ക്ലാസ് വരെ ഞാൻ ഒറ്റയ്ക്ക് വളർത്തി. ഞങ്ങളുടെ മകൾ നിധിയെ മറീന ചെറുപ്പത്തിലേ വായനയിലേക്ക് തിരിച്ചിരുന്നു, കാരണം മറീന കുടുംബിനിയായിരുന്നു, ഞാൻ അക്കാലത്തു സൈനിക ചുമതലകളിൽ മുഴുകിയിരുന്നു.

നിഖിൽ വിശദീകരിച്ചു “ഞാൻ കിൻഡർഗാർട്ടനിൽ പഠിക്കുമ്പോൾ, എല്ലാ സന്ധ്യക്കും അപ്പൻ എന്നോടൊപ്പം നിരവധി കഥാപുസ്തകങ്ങൾ വായിച്ചു. എനിക്ക് ഏറ്റവും താൽപ്പര്യമുണ്ടാക്കിയ കഥ ‘ത്രീ പിഗ്സ് ആൻഡ് എ വുൾഫ്’  (Three Pigs and a Wolf) ആയിരുന്നു. ഈ പുസ്തകം ഒരു കൊച്ചു കുട്ടിക്കു മനസ്സിലാകും വിധം നന്നായി ചിത്രീകരിച്ചിരുന്നു, ഓരോ പേജിലും ഒരു  ചിത്രവും അതിനടിയിൽ ഒരു വാചകവും, അതിനാൽ എനിക്ക് അത് മനസ്സിലാക്കാൻ എളുപ്പമായിരുന്നു. അ പ്പൻ മൂന്ന് പന്നിക്കുട്ടികൾക്ക് വ്യത്യസ്ത സ്വരം നൽകി വായിച്ചു കേൾപ്പിച്ചു. ബുദ്ധിമാനായ മൂന്നാമത്തെ പന്നിയെ അദ്ദേഹം നിഖിൽ എന്ന് പേരു നല്കി. അതാണ് എന്റെ താൽപ്പര്യം നിലനിർത്തിയത്. കൂടാതെ, അദ്ദേഹം ഓരോ തവണയും കഥയിൽ മാറ്റങ്ങൾ വരുത്തുകയും ഞാൻ അത് കേൾക്കുമ്പോഴെല്ലാം അതിൽ ആസക്തനാകുകയും ചെയ്തു.”

മാതാ പിതാ ഗുരു ദൈവം – ഈ വാക്കുകളുടെ ക്രമം വേദങ്ങളിൽ നിന്ന് ഉത്ഭവിച്ചതാണ്. ഈ നാല് വാക്കുകളിൽ ഒരു സത്യം അടങ്ങിയിരിക്കുന്നു… മതഭേദമന്യേ, ഇത് ഇന്ത്യൻ ചിന്തയുടെ അടിസ്ഥാനമായി കണക്കാക്കപ്പെടുന്നു. ഇത് സൂചിപ്പിക്കുന്നത്, മാതാപിതാക്കളായ നിങ്ങളാണ് മക്കളുടെ ആദ്യത്തെ ഗുരു. ഈ അടിസ്ഥാന സത്യം മനസ്സിലാക്കാൻ തത്വചിന്തയുടെ പിന്തുണ ആവശ്യമില്ല. എന്നാൽ, ഈ മനുഷ്യബോധത്തിന്റെ അടിസ്ഥാന തത്വം മാനവരാശിയുടെ ആരംഭകാലത്തു തന്നെ രൂപം കൊണ്ടതാണ്. തൻകുഞ്ഞ് ഏവർക്കും പൊൻകുഞ്ഞ് തന്നെ! മക്കളുടെ വായനാ കഴിവുകൾ വികസിപ്പിക്കുക എന്നത് മാതാപിതാക്കളുടെ ചുമതലയാണ്. നിങ്ങൾ എല്ലാ ദിവസവും കുട്ടിയോടൊപ്പം വായിക്കണം. കുട്ടികൾ എപ്പോഴും മാതാപിതാക്കളെ അനുകരിക്കും. വായിക്കുന്ന മാതാപിതാക്കളുടെ കുട്ടികൾക്ക് മികച്ച വായനാ കഴിവുകൾ ഉണ്ടാകും. വായിച്ചു കേൾക്കുന്നത് മക്കളിൽ വായനയിൽ പ്രിയം വളർത്തും. ഇത് വളരെ ചെറുപ്പത്തിൽ തന്നെ ആരംഭിക്കണം, കുട്ടിയെ നിങ്ങളോടൊപ്പം ഇരുത്താൻ കഴിയുന്നതുവരെ. ചൊട്ടയിലെ ശീലം ചുടലവരെ എന്നാണല്ലോ പ്രമാണം.

ഞാൻ അഞ്ചാം ക്ലാസ്സിൽ തമിഴ്നാട്ടിലെ സൈനിക സ്കൂളിൽ ചേർന്നപ്പോൾ, എനിക്ക് തമിഴ് സംസാരിക്കാനോ വായിക്കാനോ കഴിഞ്ഞിരുന്നില്ല. സഹപാഠികളുമായി ഇടപഴകിയതോടെ തമിഴ് സംസാരിക്കാൻ എളുപ്പമായി, പക്ഷേ ഭാഷ വായിക്കാൻ എങ്ങനെ പഠിക്കാം? ഞാൻ എട്ടാം ക്ലാസ്സിൽ പഠിക്കുമ്പോൾ, എന്റെ സുഹൃത്ത് വിജയ് എനിക്ക് ഒരു ഉപദേശം നൽകി, അത് ആരും കേട്ടിട്ടില്ലാത്തതായിരിക്കാം – “അവിടെ നോക്കൂ, അത് ‘രാജ രാജ ചോഴൻ’ (ராஜ ராஜ சோழன்) എന്ന സിനിമയുടെ പോസ്റ്ററാണ്. തമിഴ് അക്ഷരമാലയിലെ ഓരോ അക്ഷരവും വായിച്ച് ഒരു വാക്ക് രൂപപ്പെടുത്തുക, ഫിസിക്കൽ ട്രെയിനിംഗ് സമയത്ത് എല്ലാ ദിവസവും ഓടുമ്പോൾ നിങ്ങൾ ഒരു പോസ്റ്റർ കാണുമ്പോൾ ഈ പരിശീലനം തുടരുക.”

ഞാൻ വിജയിന്റെ ഈ തന്ത്രം നിഖിലിനോടൊപ്പം പ്രയോഗിച്ചു. കാറിൽ സഞ്ചരിക്കുമ്പോൾ ഞാൻ വഴിയോരത്തെ വിവിധ റോഡ് സൈൻസ്, ബിൽബോർഡുകൾ, കടയുടെയും റെസ്റ്റോറന്റിന്റെയും സൈൻബോർഡുകൾ ചൂണ്ടിക്കാണിച്ച് അവനെ ഉച്ചത്തിൽ വായിക്കാൻ പ്രേരിപ്പിച്ചു. പിന്നീട് ഞങ്ങൾ ആ സൈൻബോർഡുകളുടെ വിവിധ വശങ്ങളെക്കുറിച്ച് ചർച്ച ചെയ്തു.

നിങ്ങളുടെ കുട്ടി എന്താണ് വായിക്കേണ്ടത്?

മക്കളുടെ താല്പര്യത്തിനു മുൻഗണന നൽകണം, കാരണം അത് വായനശീലം നിലനിർത്തുകയും വായനാ കഴിവുകൾ മെച്ചപ്പെടുത്തുകയും ചെയ്യും. നിങ്ങളുടെ രാജ്യത്തെക്കുറിച്ചുള്ള പുസ്തകങ്ങൾ, ലോകത്തിലെ മറ്റ് പ്രധാന സ്ഥലങ്ങൾ, കാട്ടുജന്തുക്കൾ അല്ലെങ്കിൽ ഡൈനോസറുകൾ – എന്തും, പക്ഷേ പ്രായത്തിന് അനുയോജ്യമായത്. ഫിക്ഷൻ, ആക്ഷൻ, ഫാന്റസി, സയൻസ് ഫിക്ഷൻ, തമാശ കഥകൾ, കോമിക്സ്, ഇവയെല്ലാം അനുയോജ്യമാണ്. സൂപ്പർ ഹീറോ, പ്രിൻസസ്, ഡിറ്റക്ടീവ് തുടങ്ങിയവയായി കുട്ടികൾക്ക് സ്വയം ഭാവന ചെയ്യാൻ കഴിയുന്ന സാഹസിക കഥകൾ ഏറ്റവും അനുയോജ്യമാണ്.

കുട്ടി ചോദ്യങ്ങൾ ഉയർത്തുമ്പോൾ എന്തു ചെയ്യണം?

കുട്ടിക്ക് വായിക്കുമ്പോൾ ചിന്തിക്കാൻ സമയം നൽകുക, ഇത് അ വൻ/അവൾ നിങ്ങളോട് ചോദിക്കുന്ന ചോദ്യങ്ങളിലൂടെ മൂല്യനിർണ്ണയം ചെയ്യാം. പലപ്പോഴും ഇത് അസ്വസ്ഥതയുണ്ടാക്കുന്നതായിരിക്കാം. എല്ലാ ചോദ്യങ്ങൾക്കും ഉത്തരം നൽകാൻ തയ്യാറായിരിക്കുക, കുട്ടിയെ ഒരിക്കലും അവഗണിക്കരുത്. ഉത്തരം നൽകുമ്പോൾ, പ്രഭാഷണം നടത്തുന്നതിന് പകരം, നിങ്ങളുടെ കുട്ടിയോട് ചോദിക്കുക, അത് അവനോ അവളോ എന്താണ് ചിന്തിക്കുന്നതെന്ന് പറയുവാൻ പ്രേരിപ്പിക്കും. ഇത് കുട്ടിക്ക് ആത്മവിശ്വാസം നൽകും, നിങ്ങൾ ശ്രദ്ധിക്കുന്നുവെന്ന്.

കുട്ടിയുമായി ഏത് ഭാഷയിൽ സംവദിക്കണം?

പ്രധാനമായും പ്രവാസികൾക്ക് ഈ ചോദ്യം പ്രസക്തമാണ്. നിങ്ങളും കുട്ടിയും ഇഷ്ടപ്പെടുന്ന ഭാഷയിൽ സംവദിക്കാൻ ഞാൻ ശുപാർശ ചെയ്യുന്നു. ഇത് എല്ലായ്പ്പോഴും ഇംഗ്ലീഷ് ആയിരിക്കണമെന്നില്ല. നിങ്ങളുടെ മാതൃഭാഷയിൽ സംവദിക്കുന്നത് കുട്ടിയെ നിങ്ങളുടെ നാടിനെ കുറിച്ചും, കുടുംബ-സാംസ്കാരിക ചരിത്രത്തെക്കുറിച്ചും കൂടുതൽ അറിയാൻ പ്രേരിപ്പിക്കും.

നിങ്ങളുടെ കുട്ടിയുടെ വായനാ കഴിവുകൾ വികസിപ്പിക്കുന്നതിനായി നിങ്ങൾ ചെലുത്തുന്ന പ്രയത്നത്തോടെ കുട്ടികൾ മികച്ച വായനക്കാരും എഴുതുവാൻ കഴിവുള്ളവരുമായി വളരും. ഈ പാടവം അവരെ ശ്രേഷ്ഠ പൗരന്മാരാക്കി മാറ്റും.

“വായന ഒരു മനുഷ്യനെ പൂർണ്ണനാക്കുന്നു; സംവാദം അവനെ തയ്യാറാക്കുന്നു; എഴുത്ത് അവനെ ഉത്തമനാക്കുന്നു” (Reading maketh a full man; conference a ready man; and writing an exact man – Sir Francis Bacon).  ഇത് ഒന്നിൽ നിന്ന് മറ്റൊന്നിലേക്കുള്ള ക്രമാതീതമായ ഒഴുക്കാണ്. ഇന്നത്തെ സാങ്കേതിക യുഗത്തിൽ പോലും വായനാ കഴിവുകൾക്ക് പകരം മറ്റൊന്നില്ലെന്ന് നാമെല്ലാം ഓർമ്മിക്കേണ്ടതുണ്ട്. ഇത് കുട്ടിയുടെ ഗ്രേഡുകളിൽ പ്രതിഫലിക്കുകയും സർവ്വകലാശാലയിലോ ജോലിസ്ഥലത്തോ പ്രവേശിക്കുമ്പോൾ സഹായിക്കുകയും ചെയ്യും.

നിങ്ങളുടെ കുട്ടിയെ വായിക്കാനും എഴുതാനും പഠിപ്പിക്കാൻ നിങ്ങൾക്ക് പ്രത്യേക കഴിവുകൾ ആവശ്യമില്ല. നിങ്ങൾ സൂപ്പർ-പേരന്റ്സ് ആയിരിക്കേണ്ടതുമില്ല. കുട്ടിയുമായി സമയം ചെലവഴിക്കുകയും അവരുടെ കൂടെ വായിക്കുകയും ചെയ്യുന്നത് കുടുംബത്തിലും ലോകത്തിലും വലിയ മാറ്റം ഉണ്ടാക്കും.