ഹൈക്കിംഗിനിടെ കരടിയുടെ ആക്രമണം: കാനഡയിലെ ബ്രിട്ടീഷ് കൊളംബിയയിൽ രണ്ട് ഹൈക്കർമാർ ആശുപത്രിയിൽ

പ്രിൻസ് ജോർജ്, ബ്രിട്ടീഷ് കൊളംബിയ: ഞായറാഴ്ച കാനഡയിലെ പ്രിൻസ് ജോർജിനടുത്തുള്ള മക് ഗ്രിഗർ മലനിരകളിലെ ഒരു ഹൈക്കിംഗ് ട്രെയിലിൽ വെച്ച് ഗ്രിസ്‌ലി കരടിയുടെ ആക്രമണത്തിൽ രണ്ട് ഹൈക്കർമാർക്ക് പരിക്കേറ്റതായി അധികൃതർ അറിയിച്ചു. പരിക്കേറ്റവരെ ഉടൻ തന്നെ ആശുപത്രിയിൽ പ്രവേശിപ്പിച്ചു.

അധികൃതരുടെ പ്രാഥമിക റിപ്പോർട്ട് പ്രകാരം, ഹൈക്കർമാർ പ്രകൃതി ഭംഗി ആസ്വദിക്കാൻ ട്രെയിലിലൂടെ സഞ്ചരിക്കവേ അപ്രതീക്ഷിതമായി കരടിയുടെ ആക്രമണം നേരിടുകയായിരുന്നു. സംഭവത്തെ തുടർന്ന് പ്രദേശത്ത് സുരക്ഷാ മുൻകരുതലുകൾ ശക്തമാക്കിയിട്ടുണ്ട്. വന്യമൃഗങ്ങളുടെ ആക്രമണ സാധ്യത കണക്കിലെടുത്ത് ഹൈക്കർമാർ ജാഗ്രത പാലിക്കണമെന്ന് വനംവകുപ്പ് മുന്നറിയിപ്പ് നൽകി.

പരിക്കേറ്റവരിൽ ഒരാളുടെ ആരോഗ്യനില ഗുരുതരമാണെന്നും ആവശ്യമായ ചികിത്സ നൽകിവരികയാണെന്നും ആശുപത്രി അധികൃതർ വ്യക്തമാക്കി. സംഭവത്തെക്കുറിച്ച് കൂടുതൽ അന്വേഷണം നടക്കുകയാണ്.

ഗ്രിസ്‌ലി കരടി(Ursus arctos horribilis) 
ബ്രൗൺ കരടിയുടെ ഒരു ഉപജാതിയാണ് ഗ്രിസ്‌ലി കരടി . വടക്കേ അമേരിക്കയിൽ, പ്രത്യേകിച്ച് അലാസ്ക, പടിഞ്ഞാറൻ കാനഡ, അമേരിക്കയുടെ വടക്കുപടിഞ്ഞാറൻ പ്രദേശങ്ങൾ എന്നിവിടങ്ങളിൽ കാണപ്പെടുന്നു. അവയുടെ തോളിലെ പ്രത്യേകമായ കൂന് ഇവയെ എളുപ്പത്തിൽ തിരിച്ചറിയാൻ സഹായിക്കുന്നു. ഗ്രിസ്‌ലി കരടികൾക്ക് ശക്തമായ ശരീരഘടനയുണ്ട്; ആൺകരടികൾ 136 മുതൽ 680 കിലോഗ്രാം വരെ ഭാരവും, പെൺകരടികൾ അല്പം കുറഞ്ഞ ഭാരവും ഉള്ളവയാണ്. അവയുടെ രോമങ്ങൾ ഇളം തവിട്ട് മുതൽ കറുപ്പ് വരെയുള്ള നിറങ്ങളിൽ കാണപ്പെടാം, പലപ്പോഴും വെള്ളിനിറത്തിലുള്ള ഒരു തിളക്കം ഉണ്ടായിരിക്കും, ഇതാണ് "ഗ്രിസ്‌ലി" എന്ന പേര് വരാൻ കാരണം.

മിശ്രഭുക്കുകൾ ആയ ഗ്രിസ്‌ലികൾ ബെറി പഴങ്ങൾ, വേര്, മത്സ്യം, ചെറിയ സസ്തനികൾ എന്നിവയെ ആഹാരമാക്കാറുണ്ട് ചിലപ്പോൾ മൂസ് പോലുള്ള വലിയ മൃമൃഗങ്ങളെയും ഭക്ഷണമാക്കും . സാധാരണയായി ഒറ്റയ്ക്ക് ജീവിക്കുന്ന ഇവ, ഭീഷണി അനുഭവപ്പെട്ടാൽ, പ്രത്യേകിച്ച് കുഞ്ഞുങ്ങളെ സംരക്ഷിക്കുന്ന അമ്മക്കരടികൾ, ആക്രമണോത്സുകമാകാം. 48 കിലോമീറ്റർ വേഗതയിൽ ഓടാൻ കഴിവുള്ള ഇവയുടെ ശക്തമായ ശരീരവും മൂർച്ചയുള്ള നഖങ്ങളും മനുഷ്യരുമായുള്ള മുഖാമുഖങ്ങളെ അപകടകരമാക്കുന്നു. 

ശൈത്യകാലത്ത് ഉറക്കത്തിൽ പ്രവേശിക്കുന്ന (hibernation) ഗ്രിസ്‌ലി കരടികൾ, വേനൽക്കാലത്ത് ശേഖരിച്ച കൊഴുപ്പ് ശേഖരം ഉപയോഗിച്ചാണ്  ജീവൻ നിലനിർത്തുന്നത്.