14 വയസ്സിൽ താഴെയുള്ളവർക്ക് ഇ-സ്കൂട്ടറും ഇ-ബൈക്കും നിരോധിക്കാൻ നോവ സ്കോഷിയ; കർശന നിയന്ത്രണം ഉടൻ

​ഹാലിഫാക്സ് (കേരളസ്കോപ്പ്): കാനഡയിലെ നോവ സ്കോഷിയ പ്രവിശ്യയിൽ 14 വയസ്സിൽ താഴെയുള്ള കുട്ടികൾ ഇലക്ട്രിക് സ്കൂട്ടറുകളും ഇലക്ട്രിക് സൈക്കിളുകളും (ഇ-ബൈക്കുകൾ) ഓടിക്കുന്നത് നിരോധിക്കാൻ തീരുമാനം. വരുന്ന ശരത്കാലത്തോടെ (Fall) വിലക്ക് നിലവിൽ വരുമെന്ന് നോവ സ്കോഷിയ പൊതുമരാമത്ത് മന്ത്രി ഫ്രെഡ് തില്ലി വ്യാഴാഴ്ച അറിയിച്ചു. റോഡ് സുരക്ഷ മുൻനിർത്തി പ്രവിശ്യയുടെ ‘ട്രാഫിക് സേഫ്റ്റി ആക്ടിൽ’ വരുത്തുന്ന പുതിയ ഭേദഗതികളുടെ ഭാഗമായാണ് പ്രായപരിധി നിശ്ചയിക്കുന്നതെന്ന് അദ്ദേഹം വ്യക്തമാക്കി.​സാങ്കേതികവിദ്യയുടെ വളർച്ചയോടെ ഇ-സ്കൂട്ടറുകൾക്കും ഇ-ബൈക്കുകൾക്കും മുൻപത്തേക്കാൾ വേഗത കൈവരിക്കാൻ സാധിക്കുന്നുണ്ടെന്ന് മന്ത്രി ചൂണ്ടിക്കാട്ടി. സാധാരണ സൈക്കിളുകളിൽ നിന്നും വാഹനങ്ങളിൽ നിന്നും വ്യത്യസ്തമായി ഉയർന്ന വേഗതയിൽ സഞ്ചരിക്കുന്ന ഇത്തരം ഇലക്ട്രിക് വാഹനങ്ങൾ കുട്ടികൾ ഉപയോഗിക്കുന്നത് വലിയ അപകടസാധ്യത ഉണ്ടാക്കുന്നു. കാൽനടയാത്രക്കാരുടെയും മറ്റ് സൈക്കിൾ യാത്രക്കാരുടെയും സുരക്ഷ ഉറപ്പാക്കുന്നതിനാണ് പ്രവിശ്യാ ഭരണകൂടം ഈ തീരുമാനമെടുത്തത്.​കാനഡയിൽ ഇ-സ്കൂട്ടർ അപകടങ്ങൾ വർധിച്ചുവരുന്ന സാഹചര്യത്തിലാണ് ഈ നടപടി. കനേഡിയൻ ഇൻസ്റ്റിറ്റ്യൂട്ട് ഫോർ ഹെൽത്ത് ഇൻഫർമേഷന്റെ കണക്കുകൾ പ്രകാരം 2023-2024 വർഷത്തിൽ ഇ-സ്കൂട്ടർ അപകടങ്ങളെത്തുടർന്ന് 498 പേരെയാണ് ആശുപത്രിയിൽ പ്രവേശിപ്പിച്ചത്. മുൻവർഷത്തെ അപേക്ഷിച്ച് ആശുപത്രി പ്രവേശനത്തിൽ 32 ശതമാനത്തിന്റെ വർധനവാണ് ഉണ്ടായിരിക്കുന്നത്. ചെറിയ കുട്ടികളിൽ ഉണ്ടാകുന്ന അപകടങ്ങളുടെ നിരക്ക് ലഘൂകരിക്കാനും തെരുവ് സുരക്ഷ വർധിപ്പിക്കാനും പുതിയ നിയമം സഹായിക്കുമെന്നാണ് അധികൃതരുടെ വിലയിരുത്തൽ.