ഗ്രീക്ക് ഗോഡ്സ് തൈര് വിപണിയിൽ നിന്ന് തിരിച്ചുവിളിക്കുന്നു; പൂപ്പൽ ബാധ സാധ്യതയെന്ന് കോസ്റ്റ്കോയുടെ മുന്നറിയിപ്പ്

കാനഡയിലെ പ്രമുഖ റീട്ടെയിൽ ശൃംഖലയായ കോസ്റ്റ്കോയുടെ ശാഖകൾ വഴി വിറ്റഴിച്ച ജനപ്രിയ ബ്രാൻഡായ ‘ദി ഗ്രീക്ക് ഗോഡ്സ്’ (The Greek Gods) തൈര് ഉൽപന്നങ്ങൾ വിപണിയിൽ നിന്ന് തിരിച്ചുവിളിച്ചു. ഉൽപന്നങ്ങളിൽ പൂപ്പൽ ബാധയ്ക്ക് (Mould) സാധ്യതയുണ്ടെന്ന് കണ്ടെത്തിയതിനെ തുടർന്നാണ് ഉൽപ്പാദകരായ ഹെയ്ൻ സെലസ്റ്റിയൽ (Hain Celestial) മുന്നറിയിപ്പുമായി രംഗത്തെത്തിയത്. ഉപഭോക്താക്കൾ ഈ തൈര് ഉപയോഗിക്കരുതെന്നും വിൽക്കുകയോ കൈമാറുകയോ ചെയ്യരുതെന്നും അധികൃതർ കർശന നിർദേശം നൽകിയിട്ടുണ്ട്.​ഗ്രീക്ക് ഗോഡ്സിന്റെ ‘ഹണി യോഗർട്ട്’ (Honey Yogurt), ‘ഓർഗാനിക് യോഗർട്ട് പ്ലെയിൻ’ (Organic Yogurt Plain) എന്നീ രണ്ടു തരം തൈരുകളാണ് തിരിച്ചുവിളിക്കൽ പട്ടികയിലുള്ളത്. 650 ഗ്രാമിന്റെ രണ്ടു പാക്കറ്റുകൾ വീതമടങ്ങുന്ന (2 x 650g) കോമ്പോ പാക്കുകളായാണ് ഇവ വിപണിയിൽ വിറ്റഴിച്ചിരുന്നത്. 2026 ജൂൺ മാസത്തിനും ഓഗസ്റ്റ് മാസത്തിനും ഇടയിൽ കോസ്റ്റ്കോ വെയർഹൗസുകളിൽ നിന്നോ കോസ്റ്റ്കോ ബിസിനസ് സെന്ററുകളിൽ നിന്നോ വാങ്ങിയ ഉൽപന്നങ്ങൾക്കാണ് ഈ മുന്നറിയിപ്പ് ബാധകം.​ഹണി യോഗർട്ട് പാക്കറ്റുകളിൽ ‘ബെസ്റ്റ് ബിഫോർ’ തീയതി 2026 ഓഗസ്റ്റ് 1 മുതൽ സെപ്റ്റംബർ 15 വരെ രേഖപ്പെടുത്തിയവയാണ് പരിശോധിക്കേണ്ടത്. ഓർഗാനിക് യോഗർട്ട് പ്ലെയിൻ വിഭാഗത്തിൽ ഓഗസ്റ്റ് 9 മുതൽ സെപ്റ്റംബർ 13 വരെയുള്ള തീയതികൾ രേഖപ്പെടുത്തിയ ബാച്ചുകളാണ് തിരിച്ചുവിളിച്ചിരിക്കുന്നത്. വാങ്ങിയ ഉൽപന്നങ്ങളിൽ ഈ തീയതികൾ ഉണ്ടോയെന്ന് ഉപഭോക്താക്കൾ പ്രത്യേകം ഉറപ്പുവരുത്തേണ്ടതുണ്ട്.​നിർദിഷ്ട ബാച്ചുകളിൽപ്പെട്ട തൈര് കൈവശമുള്ള ഉപഭോക്താക്കൾക്ക് അത് തൊട്ടടുത്തുള്ള ഏത് കോസ്റ്റ്കോ വെയർഹൗസിലും തിരികെ നൽകി പണം പൂർണമായി കൈപ്പറ്റാവുന്നതാണ്. ഇതുമായി ബന്ധപ്പെട്ട് കൂടുതൽ സംശയങ്ങളുള്ള ഉപഭോക്താക്കൾക്ക് നിർമാതാക്കളായ ഹെയ്ൻ സെലസ്റ്റിയലിന്റെ ഉപഭോക്തൃ സേവന നമ്പറിലോ ഇമെയിലിലോ ബന്ധപ്പെടാവുന്നതാണെന്നും കമ്പനി വ്യക്തമാക്കിയിട്ടുണ്ട്.