ഓന്റാറിയോ ബജറ്റ് 13 ശതകോടി ഡോളറായി കുറഞ്ഞു; ആരോഗ്യ, വിദ്യാഭ്യാസ മേഖലകളിൽ ഭീമമായ ചെലവഴിക്കലെന്ന് റിപ്പോർട്ട്

​ടൊറന്റോ, കാനഡ: കാനഡയിലെ ഓന്റാറിയോ പ്രവിശ്യാ സർക്കാരിന്റെ വാർഷിക സാമ്പത്തിക കമ്മി പ്രതീക്ഷിച്ചതിലും നേരിയ തോതിൽ കുറഞ്ഞതായി ഔദ്യോഗിക റിപ്പോർട്ട്. 2025-26 സാമ്പത്തിക വർഷത്തിലെ പബ്ലിക് അക്കൗണ്ട്സ് റിപ്പോർട്ട് പ്രകാരം പ്രവിശ്യയുടെ ബജറ്റ് കമ്മി 13 ശതകോടി (13 billion) ഡോളറിലെത്തി. 2025 ലെ ബജറ്റ് അവതരണ വേളയിൽ ഡഗ് ഫോർഡ് സർക്കാർ പ്രവചിച്ചിരുന്ന 14.6 ശതകോടി ഡോളറിനേക്കാൾ കുറവാണിത്. 2024-25 സാമ്പത്തിക വർഷത്തിൽ പ്രവിശ്യ നേരിട്ട 1.1 ശതകോടി ഡോളറിന്റെ കമ്മിയുമായി താരതമ്യം ചെയ്യുമ്പോൾ വലിയ വർധനവാണ് ഇത്തവണ രേഖപ്പെടുത്തിയിരിക്കുന്നത്.​ആരോഗ്യ സംരക്ഷണം, വിദ്യാഭ്യാസം എന്നീ മേഖലകളിൽ വരുത്തിയ ഭീമമായ തുകയുടെ വർധനവാണ് കമ്മിയുടെ പ്രധാന കാരണമെന്ന് പ്രാദേശിക ഭരണകൂടം വ്യക്തമാക്കി. ആരോഗ്യ മേഖലയ്ക്കും സ്കൂൾ വിദ്യാഭ്യാസത്തിനും വേണ്ടി പദ്ധതി ചെലവുകളിൽ ഏകദേശം 10 ശതകോടി ഡോളറിന്റെ അധിക നിക്ഷേപമാണ് സർക്കാർ നടത്തിയത്. ആരോഗ്യ സംരക്ഷണ ചെലവുകൾ 6.2 ശതകോടി ഡോളർ വർധിച്ച് ആകെ 97.5 ശതകോടി ഡോളറിലെത്തി. അതേസമയം, വിദ്യാഭ്യാസ മേഖലയിലെ ചെലവുകൾ 2.3 ശതകോടി ഡോളർ ഉയർന്ന് 40.1 ശതകോടി ഡോളർ രേഖപ്പെടുത്തി.​അതേസമയം, പ്രവിശ്യാ സർക്കാരിന് കീഴിലുള്ള സ്ഥാപനങ്ങളായ എൽ.സി.ബി.ഒ. (LCBO), ഓന്റാറിയോ ലോട്ടറി ആൻഡ് ഗെയിമിംഗ് കോർപ്പറേഷൻ (OLG) എന്നിവയിൽ നിന്നുള്ള വരുമാനം ഉയർന്നത് കമ്മിയുടെ വ്യാപ്തി കുറയ്ക്കാൻ സർക്കാരിനെ സഹായിച്ചു. മുൻകൂട്ടി കണക്കാക്കിയതിനേക്കാൾ കൂടുതൽ വരുമാനം ഇത്തരം പൊതുമേഖലാ വ്യവസായങ്ങളിൽ നിന്ന് ലഭിച്ചതാണ് സാമ്പത്തിക പ്രതിസന്ധിയുടെ ആഘാതം കുറച്ചത്.