ട്രംപ് ഭരണകൂടത്തിന്റെ ആവശ്യങ്ങൾ നിരാകരിച്ച് ഹാർവാർഡ് സർവകലാശാല; ഫെഡറൽ ഫണ്ടിംഗ് മരവിപ്പിച്ചു

വാഷിംഗ്ടൺ: ക്യാംപസിലെ യഹൂദവിരുദ്ധത (anti semitism) തടയണമെന്ന അമേരിക്കൻ ഭരണകൂടത്തിന്റെ ആവശ്യം സർവകലാശാല അധികൃതർ നിരാകരിച്ചതിനെ തുടർന്നു 2.2 ബില്യൺ ഡോളർ ഗ്രാന്റുകളും 60 മില്യൺ ഡോളർ വരുന്ന കരാറുകളും മരവിപ്പിക്കാൻ തീരുമാനിച്ചതായി യു എസ് വിദ്യാഭ്യാസ വകുപ്പ് അറിയിച്ചു. ചരിത്രത്തിൽ ആദ്യമായാണ് ഒരു സർവകലാശാലയ്ക്കുള്ള
ഇത്രയും ഭീമമായ ഫെഡറൽ ഫണ്ടിംഗ് താൽക്കാലികമായി നിർത്തിവെക്കുന്നത്. ഏപ്രിൽ 14, 2025-നാണ് ഈ നടപടികൾ പ്രഖ്യാപിച്ചത്.

സംഘർഷത്തിന്റെ തുടക്കം എങ്ങനെ?

ഏപ്രിൽ 11-ന് ട്രംപ് ഭരണകൂടം ഹാർവാർഡിന് അയച്ച കത്തിൽ, ക്യാമ്പസിലെ ആന്റിസെമിറ്റിസം (യഹൂദവിരുദ്ധത) തടയുന്നതിൽ സർവകലാശാല പരാജയപ്പെട്ടുവെന്ന ആരോപണവും, ഫെഡറൽ സഹായം തുടരണമെങ്കിൽ നിരവധി അടിസ്ഥാനപരമായ മാറ്റങ്ങൾ നടപ്പാക്കണമെന്ന ആവശ്യവുമാണ് ഉന്നയിച്ചത്. ഡൈവേഴ്സിറ്റി, എക്വിറ്റി, ഇൻക്ലൂഷൻ (DEI) പദ്ധതികൾ പൂർണ്ണമായും അവസാനിപ്പിക്കുക, മെറിറ്റ് അടിസ്ഥാനത്തിലുള്ള നിയമനം നടപ്പാക്കുക, “വ്യൂപോയിന്റ് ഡൈവേഴ്സിറ്റി ” ഉറപ്പാക്കാൻ മൂന്നാം കക്ഷി ഓഡിറ്റ് നടത്തുക, അന്താരാഷ്ട്ര വിദ്യാർത്ഥികളുടെ ആശയപരമായ നിലപാടുകൾ പരിശോധിക്കുക തുടങ്ങിയവയാണ് പ്രധാന ആവശ്യങ്ങൾ.

കൂടാതെ, വിദ്യാർത്ഥി പ്രതിഷേധങ്ങൾ നിയന്ത്രിക്കുക, സർവകലാശാലയുടെ ഭരണഘടന പുനഃസംഘടിപ്പിക്കുക തുടങ്ങിയ കാര്യങ്ങളും ഉൾപ്പെടുത്തിയിരുന്നു. ഹാർവാർഡ് നേതൃത്വം ഈ ആവശ്യങ്ങൾ അക്കാദമിക സ്വാതന്ത്ര്യത്തെയും സർവകലാശാലയുടെ സ്വയംഭരണത്തെയും ഹനിക്കുന്ന ഭരണകൂട ഇടപെടലാണെന്ന് വിമർശിച്ചു.

ഹാർവാർഡിന്റെ പ്രതികരണം

ഹാർവാർഡ് പ്രസിഡന്റ് അലൻ ഗാർബർ സർവകലാശാലാ സമൂഹത്തിന് അയച്ച കത്തിൽ, ‘സർവകലാശാലയുടെ സ്വാതന്ത്ര്യവും ഭരണഘടനാപരമായ അവകാശങ്ങളും തങ്ങൾ അടിയറ വയ്ക്കില്ല എന്ന് വ്യക്തമാക്കി.’ “ഏത് പാർട്ടിയാണ് അധികാരത്തിലിരിക്കുന്നതെങ്കിലും, സ്വകാര്യ സർവകലാശാലകൾ എന്താണ് പഠിപ്പിക്കേണ്ടത്, ആരെയാണ് പ്രവേശിപ്പിക്കേണ്ടത്, നിയമിക്കേണ്ടത് എന്നതിൽ സർക്കാർ കൈകടത്തലുകൾ പാടില്ല,” എന്നും അദ്ദേഹം വ്യക്തമാക്കി. അതേ സമയം, ക്യാംപസുകളിലെ ആന്റി സെമിറ്റിസ്റ്റ് പ്രവണതകൾ നേരിടാൻ സർവകലാശാല വ്യാപകമായ നടപടികൾ എടുത്തിട്ടുണ്ടെന്നും അദ്ദേഹം കൂട്ടിച്ചേർത്തു.
സർവകലാശാലയുടെ ഈ നിലപാടിനെ പിന്തുണച്ച്, ഫാക്കൽറ്റി സംഘടനകളും ഫെഡറൽ ഫണ്ടിംഗ് നിർത്തലാക്കുന്നത് ഭരണഘടനാപരമായ സ്വാതന്ത്ര്യങ്ങൾ ലംഘിക്കുന്നതാണെന്ന് ചൂണ്ടിക്കാട്ടി കോടതിയെ സമീപിച്ചിട്ടുണ്ട്.

ഫണ്ടിംഗ് നിർത്തലാക്കലിന്റെ പ്രത്യാഘാതങ്ങൾ

ഹാർവാർഡിന് 53.2 ബില്യൺ ഡോളർ ഫണ്ടിങ് ഉണ്ടെങ്കിലും, അതിൽ വെറും 20% മാത്രമാണ് സ്വതന്ത്രമായി ഉപയോഗിക്കാൻ കഴിയുക. അതിനാൽ, ഗവേഷണത്തിനും സഹബന്ധിത സ്ഥാപനങ്ങൾക്കും (Mass General Brigham, Boston Children’s Hospital തുടങ്ങിയവ) ഈ ഫണ്ടിംഗ് നിർത്തലാക്കൽ വലിയ സാമ്പത്തിക സമ്മർദ്ദം സൃഷ്ടിക്കും. മാർച്ചിൽ തന്നെ ഹാർവാർഡ് താൽക്കാലിക നിയമന നിരോധനം പ്രഖ്യാപിച്ചിരുന്നു.

ഭരണകൂടത്തിന്റെ നിലപാട്

ഹാർവാർഡിന്റെ അനുസരണക്കേട് ഫെഡറൽ സിവിൽ റൈറ്റ്സ് നിയമം ലംഘിക്കുന്നതാണെന്ന് ട്രംപ് ഭരണകൂടം ആരോപിക്കുന്നു. “ഫെഡറൽ ഫണ്ടിംഗ് ലഭിക്കാൻ സിവിൽ റൈറ്റ്സ് നിയമങ്ങൾ പാലിക്കാൻ സർവകലാശാലകൾ ബാധ്യസ്ഥരാണ്,” എന്ന് ഭരണകൂടം വ്യക്തമാക്കി. ഡൈവേഴ്സിറ്റി, എക്വിറ്റി, ഇൻക്ലൂഷൻ പദ്ധതികൾ ആന്റിസെമിറ്റിസവും വംശീയ വിവേചനവും വളർത്തുന്നുവെന്ന ആരോപണവും മുന്നോട്ടുവച്ചു.

മറ്റ് സർവകലാശാലകളും ഭീഷണിയിൽ

കൊളംബിയ, കോർണൽ, നോർത്ത്‌വെസ്റ്റേൺ തുടങ്ങിയ മറ്റ് പ്രമുഖ സർവകലാശാലകളും സമാനമായ ഭീഷണികൾ നേരിടുന്നുണ്ട്. കൊളംബിയ സർവകലാശാലയ്ക്ക് ഭാഗികമായി ഭരണകൂട നിർദ്ദേശങ്ങൾ അനുസരിച്ചതിന്റെ ഫലമായി 400 മില്യൺ ഡോളർ ഫെഡറൽ സഹായം ലഭിച്ചു.

ഹാർവാർഡിന്റെ നിലപാടിനെ അനുകൂലിച്ചും പ്രതികൂലിച്ചും ആളുകൾ രംഗത്തെത്തിയിട്ടുണ്ട്. അക്കാദമിക് സ്വാതന്ത്ര്യത്തിനും സർവകലാശാലയുടെ സ്വയംഭരണത്തിനും വേണ്ടി ഹാർവാർഡ് നിലകൊള്ളണമെന്ന് ചിലർ വിശ്വസിക്കുന്നു. എന്നാൽ, പാലസ്തീൻ അനുകൂല പ്രതിഷേധങ്ങളുമായി ബന്ധപ്പെട്ട ആന്റിസെമിറ്റിസം ആരോപണങ്ങൾക്കു നേരെ സർവകലാശാല കർശന നടപടി സ്വീകരിക്കാത്തതാണ് നിലവിലെ പ്രതിസന്ധിക്കു കാരണമെന്ന് വിമർശകരും ആരോപിക്കുന്നു.

ഭാവി പ്രത്യാശകളും ആശങ്കകളും

ഈ സംഘർഷം അമേരിക്കൻ ഉന്നത വിദ്യാഭ്യാസ മേഖലയിലെ സർക്കാർ-സർവകലാശാല ബന്ധം പുനർനിർവചിക്കുമോ എന്നതാണ് പ്രധാന ചോദ്യമായി നിലനിൽക്കുന്നത്. മറ്റ് സർവകലാശാലകൾ ഹാർവാർഡിന്റെ മാതൃക പിന്തുടരുമോ, അതോ സാമ്പത്തിക സമ്മർദ്ദം മൂലം ഭരണകൂട സമ്മർദ്ദങ്ങൾക്ക് വഴങ്ങി സ്വയംഭരണാവകാശം അടിയറവയ്ക്കുമോ എന്നതും കാത്തിരുന്നു കാണേണ്ടതാണ്.