ഒട്ടാവ, കാനഡ: ഗ്രാമീണ, വിദൂര മേഖലകളിലേക്ക് തൊഴിൽ നൈപുണ്യമുള്ളവരെ എത്തിക്കുന്നതിനായി 2025 ജനുവരിയിൽ ആരംഭിച്ച റൂറൽ കമ്മ്യൂണിറ്റി ഇമിഗ്രേഷൻ പൈലറ്റ് (Rural Community Immigration Pilot) സ്ഥിരം പദ്ധതിയായി മാറ്റുന്നതായി കനേഡിയൻ സർക്കാർ പ്രഖ്യാപിച്ചു. നവംബർ 9-ന് ഇമിഗ്രേഷൻ, അഭയാർഥി, പൗരത്വ വകുപ്പ് മന്ത്രി ലെന മെറ്റ്ലേജ് ഡയബ് ആണ് ഇക്കാര്യം അറിയിച്ചത്.
പുതിയ റൂറൽ കമ്മ്യൂണിറ്റി ഇമിഗ്രേഷൻ പ്രോഗ്രാം (Rural Community Immigration Program) പൈലറ്റ് ഘട്ടത്തിലെ മാതൃക തന്നെ തുടരും. മുൻഗണനാ മേഖലകളിലെ വിദഗ്ധ തൊഴിലാളികൾക്കും അന്താരാഷ്ട്ര ബിരുദധാരികൾക്കും കാനഡയിൽ സ്ഥിരതാമസത്തിലേക്കുള്ള (PR) വഴി തുറക്കുന്ന സാമ്പത്തിക കുടിയേറ്റ പദ്ധതിയാണിത്. ഇമിഗ്രേഷൻ വകുപ്പും (IRCC) പ്രാദേശിക സാമ്പത്തിക വികസന സംഘടനകളും സഹകരിച്ചാണ് ഇത് നടപ്പാക്കുക.
പൈലറ്റിൽ പങ്കെടുത്ത 14 സമൂഹങ്ങളും സ്ഥിരം പദ്ധതിയിലും പങ്കാളികളാകുമെന്നാണ് പ്രതീക്ഷ. നോവ സ്കോഷ്യയിലെ പിക്റ്റൂ കൗണ്ടി; ഒന്റാറിയോയിലെ നോർത്ത് ബേ, സഡ്ബറി, ടിമ്മിൻസ്, സോൾട്ട് സ്റ്റെ. മാരി, തണ്ടർ ബേ; മാനിറ്റോബയിലെ സ്റ്റെയ്ൻബാക്ക്, ആൾട്ടോണ/റൈൻലാൻഡ്, ബ്രാൻഡൻ; സസ്കാച്വാനിലെ മൂസ് ജോ; ആൽബർട്ടയിലെ ക്ലെയേഴ്സ്ഹോം; ബ്രിട്ടീഷ് കൊളംബിയയിലെ വെസ്റ്റ് കൂട്ടേനെ, നോർത്ത് ഒകനാഗൻ ഷുസ്വാപ്, പീസ് ലിയാർഡ് എന്നിവയാണ് ഈ സമൂഹങ്ങൾ.
- വർക്ക് പെർമിറ്റിലുള്ള വിദഗ്ധ തൊഴിലാളികൾ: പട്ടികയിലെ 14 സമൂഹങ്ങളിൽ മുൻഗണനാ മേഖലയിൽ ഡെസിഗ്നേറ്റഡ് തൊഴിലുടമയുടെ കീഴിൽ ജോലി ലഭിച്ചാൽ ഈ പദ്ധതിയിലൂടെ PR-ലേക്കുള്ള വഴി തേടാം.
- അന്താരാഷ്ട്ര ബിരുദധാരികൾ (മലയാളി വിദ്യാർഥികൾ ഉൾപ്പെടെ): സ്ഥിരം പദ്ധതിയിൽ ഇവരും ഉൾപ്പെടുന്നതിനാൽ, ഒന്റാറിയോ, മാനിറ്റോബ, ബ്രിട്ടീഷ് കൊളംബിയ തുടങ്ങിയ പ്രവിശ്യകളിലെ ചെറുപട്ടണങ്ങളിൽ ജോലി തേടുന്നത് PR ആസൂത്രണത്തിന്റെ ഭാഗമാക്കാം.
- ജോലി തേടുന്നവർ: ഏത് തൊഴിലുടമയ്ക്കും ഈ പദ്ധതിയിൽ ഉൾപ്പെടാനാകില്ല. അതത് സമൂഹം ഡെസിഗ്നേറ്റ് ചെയ്ത തൊഴിലുടമകളുടെ ഓഫർ മാത്രമേ പരിഗണിക്കൂ. അതിനാൽ അതത് സമൂഹത്തിന്റെ സാമ്പത്തിക വികസന സംഘടനയോട് മുൻഗണനാ മേഖലകളും ഡെസിഗ്നേറ്റഡ് തൊഴിലുടമകളുടെ പട്ടികയും ചോദിച്ചറിയുക.
- അപേക്ഷിക്കുംമുൻപ്: പുതിയ പ്രോഗ്രാമിന്റെ അപേക്ഷാ തീയതികളും വിശദമായ യോഗ്യതാ നിബന്ധനകളും ഈ പ്രഖ്യാപനത്തിൽ വ്യക്തമാക്കിയിട്ടില്ല. IRCC-യുടെ ഔദ്യോഗിക വെബ്സൈറ്റിലെ അറിയിപ്പുകൾ പരിശോധിക്കുക.
ജനസംഖ്യാ ഇടിവ്, തൊഴിൽശക്തിയുടെ വാർധക്യം, തുടർച്ചയായ തൊഴിലാളിക്ഷാമം തുടങ്ങിയ വെല്ലുവിളികൾ ഗ്രാമീണ, വിദൂര സമൂഹങ്ങൾ നേരിടുന്നുണ്ടെന്ന് സർക്കാർ ചൂണ്ടിക്കാട്ടി. ഇത്തരം പ്രദേശങ്ങളിലെ സാമ്പത്തിക വളർച്ചയെ പിന്തുണയ്ക്കാനാണ് പദ്ധതി ലക്ഷ്യമിടുന്നത്. പുതുതായി എത്തുന്നവരെ ആകർഷിക്കാനും സ്വാഗതം ചെയ്യാനും ഉൾച്ചേർക്കാനും നിലനിർത്താനും സമൂഹങ്ങൾ നേതൃത്വം നൽകുന്ന നൂതന മാർഗങ്ങളെ പ്രോത്സാഹിപ്പിക്കും.
പദ്ധതിയുടെ പ്രവർത്തനം മൂന്ന് പ്രധാന ഘടകങ്ങളിൽ അധിഷ്ഠിതമാണ്. ഒന്നാമതായി, പ്രാദേശിക തൊഴിൽ വിപണിയുടെ ആവശ്യവും സാമ്പത്തിക വികസന തന്ത്രവും അടിസ്ഥാനമാക്കി മുൻഗണനാ മേഖലകളും തൊഴിലുകളും തീരുമാനിക്കുന്നത് പങ്കാളിത്ത സമൂഹങ്ങളാണ്. രണ്ടാമതായി, തൊഴിലുടമകളെ സമൂഹങ്ങൾ പരിശോധിച്ച് 'ഡെസിഗ്നേറ്റ്' ചെയ്യും. തൊഴിൽ ആവശ്യകത, നല്ല നില, പുതിയ ജീവനക്കാരെ പിന്തുണയ്ക്കാനുള്ള ശേഷി എന്നിവ പരിഗണിച്ചാണിത്. മുൻഗണനാ മേഖലകളിലെ ഡെസിഗ്നേറ്റഡ് തൊഴിലുടമകൾക്കു മാത്രമേ പദ്ധതി ഉപയോഗിക്കാനാകൂ.
മൂന്നാമതായി, പദ്ധതിയുടെ സുതാര്യതയും തൊഴിലുടമകളുടെ ഉത്തരവാദിത്തവും ശക്തമാക്കുന്ന നടപടികളുണ്ട്. പദ്ധതിയുടെ ആവശ്യകതകളും ചുമതലകളും മനസ്സിലാക്കാൻ തൊഴിലുടമകൾക്ക് നിർബന്ധിത പരിശീലനം, ഫലങ്ങൾ വിലയിരുത്താനും നിയമപാലനം ഉറപ്പാക്കാനുമുള്ള കർശന നിരീക്ഷണ, റിപ്പോർട്ടിങ് വ്യവസ്ഥകൾ എന്നിവ ഇതിൽ ഉൾപ്പെടുന്നു.
ജനസംഖ്യ 200,000-ൽ താഴെയുള്ളതും സ്റ്റാറ്റിസ്റ്റിക്സ് കാനഡയുടെ ഇൻഡെക്സ് ഓഫ് റിമോട്ട്നെസിൽ (Index of Remoteness) 0.20 അല്ലെങ്കിൽ അതിനു മുകളിൽ സ്കോർ ചെയ്യുന്നതുമായ വിദൂര സമൂഹങ്ങൾക്ക് എക്സ്പ്രഷൻ ഓഫ് ഇന്ററസ്റ്റ് പ്രക്രിയയിലൂടെ അപേക്ഷിക്കാം. പൈലറ്റിലെ സമൂഹങ്ങളെ തിരഞ്ഞെടുത്തത് സാമ്പത്തിക ആവശ്യം, പുതുതായി എത്തുന്നവരെ സ്വീകരിക്കാനുള്ള ശേഷി, ഭരണപരമായ പരിചയം എന്നിവ പരിഗണിച്ചാണ്.
Photo: Oleg Bersenev / Unsplash
