ശ്രീഹരിക്കോട്ട: ഇന്ത്യൻ ബഹിരാകാശ ചരിത്രത്തിൽ പുതിയ സുവർണ്ണ അധ്യായം എഴുതിച്ചേർത്ത് രാജ്യം. ഇന്ത്യയിലെ പ്രമുഖ ബഹിരാകാശ സ്റ്റാർട്ടപ്പായ സ്കൈറൂട്ട് എയറോസ്പേസ് (Skyroot Aerospace) വികസിപ്പിച്ച രാജ്യത്തെ ആദ്യത്തെ സ്വകാര്യ ഓർബിറ്റൽ റോക്കറ്റ് ‘വിക്രം-1′ (Vikram-1) വിജയകരമായി വിക്ഷേപിച്ചു. ആന്ധ്രാപ്രദേശിലെ ശ്രീഹരിക്കോട്ടയിലുള്ള സതീഷ് ധവാൻ സ്പേസ് സെന്ററിൽ നിന്ന് ശനിയാഴ്ച ഉച്ചയ്ക്ക് 12:05 ഓടെയായിരുന്നു ചരിത്രപരമായ ഈ വിക്ഷേപണം.’മിഷൻ ആഗമൻ’ (Mission Aagaman) എന്ന് പേരിട്ടിരുന്ന ഈ പ്രഥമ ദൗത്യം അതിന്റെ ആദ്യ ശ്രമത്തിൽ തന്നെ ലക്ഷ്യം കണ്ടു. ഇതോടെ, സ്വകാര്യ പങ്കാളിത്തത്തോടെ ഓർബിറ്റൽ വിക്ഷേപണ ശേഷി കൈവരിക്കുന്ന ലോകത്തിലെ മൂന്നാമത്തെ രാജ്യമായി ഇന്ത്യ മാറി. അമേരിക്ക, ചൈന എന്നീ രാജ്യങ്ങൾ മാത്രമാണ് ഇതിനുമുമ്പ് ഈ നേട്ടം കൈവരിച്ചിട്ടുള്ളത്.ആദ്യ ശ്രമത്തിൽ തന്നെ ലക്ഷ്യത്തിലേക്ക്വിക്ഷേപണം കഴിഞ്ഞ് ഏകദേശം 15 മിനിറ്റുകൾക്കുള്ളിൽ തന്നെ വിക്രം-1 റോക്കറ്റ് ഭൂമിയിൽ നിന്നും 450 കിലോമീറ്റർ ഉയരത്തിലുള്ള അപ്പർ ലോവർ എർത്ത് ഓർബിറ്റിൽ (Low-Earth Orbit) ഉപഗ്രഹങ്ങളെ വിജയകരമായി എത്തിച്ചു. ജർമ്മൻ കമ്പനിയായ DCUBED-ന്റെ സാങ്കേതികവിദ്യാ പരീക്ഷണ പേലോഡ്, ഇന്ത്യൻ സ്റ്റാർട്ടപ്പായ ഗ്രഹ സ്പേസിന്റെ (Grahaa Space) ‘സൊളാരിസ് S3’ നാനോ സാറ്റലൈറ്റ്, കോസ്മോസെർവ് സ്പേസിന്റെ റോബോട്ടിക് ആം ഉൾപ്പെടെയുള്ള വിവിധ ഉപഗ്രഹങ്ങളും പേലോഡുകളുമാണ് വിക്രം-1 ഭ്രമണപഥത്തിൽ എത്തിച്ചത്.വിക്ഷേപണത്തിന് ശേഷം സ്കൈറൂട്ട് മിഷൻ കൺട്രോൾ ഔദ്യോഗികമായി ‘ഓർബിറ്റ് അച്ചീവ്ഡ്’ (ഭ്രമണപഥം കൈവരിച്ചു) എന്ന് പ്രഖ്യാപിച്ചതോടെ ശാസ്ത്രജ്ഞർ ആഹ്ലാദപ്രകടനം നടത്തി. “മിഷൻ ആഗമൻ വൻ വിജയമാണ്. ഇതൊരു പരീക്ഷണ പറക്കലായിരുന്നു, വാണിജ്യ സർവീസുകളിലേക്ക് കടക്കുന്നതിന് മുൻപ് ഇനിയും ഇത്തരം പരീക്ഷണങ്ങൾ നടത്തും,” സ്കൈറൂട്ട് സി.ഇ.ഒ പവൻ കുമാർ ചന്ദന വ്യക്തമാക്കി.കാർബൺ ഫൈബറും 3D പ്രിന്റഡ് എഞ്ചിനുംഏഴ് നില കെട്ടിടത്തിന്റെ ഉയരമുള്ള (ഏകദേശം 22 മീറ്റർ) വിക്രം-1 ഒരു ഫോർ-സ്റ്റേജ് റോക്കറ്റാണ്. ഇതിന്റെ ആദ്യ മൂന്ന് ഘട്ടങ്ങളിൽ ഖര ഇന്ധനവും (Solid Fuel), അവസാന ഘട്ടത്തിൽ ദ്രവ ഇന്ധനവുമാണ് (Liquid Fuel) ഉപയോഗിക്കുന്നത്. റോക്കറ്റിന്റെ ഭാരം കുറയ്ക്കുന്നതിനായി പൂർണ്ണമായും കാർബൺ-കോമ്പോസിറ്റ് എയർഫ്രെയിമിലാണ് ഇത് നിർമ്മിച്ചിരിക്കുന്നത്. കൂടാതെ ഇതിന്റെ അപ്പർ സ്റ്റേജിൽ ഉപയോഗിച്ചിരിക്കുന്ന എഞ്ചിൻ പൂർണ്ണമായും 3D പ്രിന്റ് ചെയ്തെടുത്തതാണെന്ന പ്രത്യേകതയുമുണ്ട്. 350 കിലോഗ്രാം വരെയുള്ള ചെറിയ ഉപഗ്രഹങ്ങളെ ബഹിരാകാശത്ത് എത്തിക്കാൻ ഈ റോക്കറ്റിന് ശേഷിയുണ്ട്.ഐഎസ്ആർഒയുടെ (ISRO) മുൻ ശാസ്ത്രജ്ഞരായ പവൻ കുമാർ ചന്ദന, നാഗ ഭരത് ദാക എന്നിവർ ചേർന്ന് 2018-ലാണ് ഹൈദരാബാദ് ആസ്ഥാനമായി സ്കൈറൂട്ട് എയറോസ്പേസ് സ്ഥാപിച്ചത്. 2022 നവംബറിൽ ഇവർ ‘വിക്രം-എസ്’ എന്ന സബ്-ഓർബിറ്റൽ റോക്കറ്റ് വിജയകരമായി വിക്ഷേപിച്ച് ചരിത്രം കുറിച്ചിരുന്നു. ഐഎസ്ആർഒയുടെയും ഇൻ-സ്പേസിന്റെയും (IN-SPACe) പൂർണ്ണമായ സാങ്കേതിക പിന്തുണയോടെയാണ് സ്കൈറൂട്ട് ഈ നേട്ടം സ്വന്തമാക്കിയത്.പ്രധാനമന്ത്രി നരേന്ദ്ര മോദി സ്കൈറൂട്ട് ടീമിനെ ഫോണിൽ വിളിച്ച് അഭിനന്ദനങ്ങൾ അറിയിച്ചു. ഇന്ത്യയുടെ ബഹിരാകാശ യാത്രയിലെ നിർണ്ണായക നിമിഷമാണിതെന്നും സ്വകാര്യ മേഖലയുടെ പങ്കാളിത്തം രാജ്യത്ത് പുതിയ മുന്നേറ്റങ്ങൾക്ക് കാരണമാകുമെന്നും അദ്ദേഹം എക്സിൽ (X) കുറിച്ചു. വാണിജ്യ ഉപഗ്രഹ വിക്ഷേപണ രംഗത്ത് ആഗോളതലത്തിൽ ഇലോൺ മസ്കിന്റെ സ്പേസ് എക്സ് (SpaceX) ഉൾപ്പെടെയുള്ള വമ്പന്മാരോട് മത്സരിക്കാൻ ഇന്ത്യയിലെ സ്വകാര്യ ബഹിരാകാശ മേഖലയ്ക്ക് കരുത്തുപകരുന്നതാണ് വിക്രം-1-ന്റെ ഈ ചരിത്ര വിജയം.
