കാനഡയിൽ വൻ സൈബർ ആക്രമണം: ഒന്റാറിയോ കോടതി രേഖകളും വ്യക്തിവിവരങ്ങളും ചോർന്നതായി സംശയം

ടൊറന്റോ, കാനഡ: കാനഡയിലെ ഒന്റാറിയോ പ്രവിശ്യാ കോടതികളുടെ ഓൺലൈൻ കേസ് മാനേജ്‌മെന്റ് സിസ്റ്റത്തിന് നേരെ ഉണ്ടായ വൻ സൈബർ ആക്രമണത്തിൽ നിരവധി ആളുകളുടെ വ്യക്തിഗത വിവരങ്ങൾ ചോർന്നതായി റിപ്പോർട്ട്. കോടതി നടപടികളിൽ ഉൾപ്പെട്ട വ്യക്തികളുടെ വിവരങ്ങൾ അജ്ഞാത ശക്തികൾ കൈക്കലാക്കിയതായി ഒന്റാറിയോ ചീഫ് ജസ്റ്റിസുമാർ സംയുക്ത പ്രസ്താവനയിലൂടെ മുന്നറിയിപ്പ് നൽകി. തോംസൺ റൂയിട്ടേഴ്‌സ് കാനഡ ലിമിറ്റഡിന്റെ ഉടമസ്ഥതയിലുള്ള ‘സി-ട്രാക്ക്’ (C-Track) എന്ന ഓൺലൈൻ കേസ് മാനേജ്‌മെന്റ് പ്ലാറ്റ്‌ഫോമിന് നേരെയാണ് ആക്രമണമുണ്ടായത്.​ഒന്റാറിയോ കോർട്ട് ഓഫ് അപ്പീൽ, ഒന്റാറിയോ സുപ്പീരിയർ കോർട്ട് ഓഫ് ജസ്റ്റിസ്, ഒന്റാറിയോ കോർട്ട് ഓഫ് ജസ്റ്റിസ് എന്നീ മൂന്ന് പ്രധാന കോടതികളാണ് കേസ് വിവരങ്ങൾ സൂക്ഷിക്കാൻ ഈ പ്ലാറ്റ്‌ഫോം ഉപയോഗിക്കുന്നത്. ജൂൺ 30-ന് ക്ലൗഡ് നെറ്റ്‌വർക്കിൽ സംശയാസ്പദമായ പ്രവർത്തനങ്ങൾ കണ്ടതിനെ തുടർന്ന് കമ്പനി നടത്തിയ അന്വേഷണത്തിലാണ് മാർച്ച് മാസം മുതൽ തന്നെ വിവരങ്ങൾ ചോർന്നുതുടങ്ങിയിരുന്നു എന്ന് വ്യക്തമായത്. കോടതികളുടെ പ്രാദേശിക ശൃംഖലയുടെ സുരക്ഷാവീഴ്ച മൂലമല്ല, മറിച്ച് ക്ലൗഡ് പ്ലാറ്റ്‌ഫോമിലെ സുരക്ഷാ പാളിച്ചയാണ് ചോർച്ചയ്ക്ക് കാരണമായതെന്ന് അധികൃതർ വ്യക്തമാക്കി.​പേരുകളും മറ്റ് വ്യക്തിഗത വിവരങ്ങളും അടങ്ങിയ രേഖകൾ ചോർന്നതായി സ്ഥിരീകരിച്ചിട്ടുണ്ടെങ്കിലും, ഏതെല്ലാം തരം വിവരങ്ങളാണ് നഷ്ടപ്പെട്ടതെന്നോ എത്രപേരെ ഇത് ബാധിച്ചുവെന്നോ നിലവിൽ വ്യക്തമല്ല. ഇതേ സാങ്കേതികവിദ്യ ഉപയോഗിക്കുന്ന അമേരിക്കയിലെ 12-ഓളം സംസ്ഥാനങ്ങളിലെ കോടതികളിലും ആലാബമ, കെന്റക്കി, ഒഹായോ, സൌത്ത് കരോലിന തുടങ്ങിയ പ്രദേശങ്ങളിലെ സംവിധാരണങ്ങളിലും സമാനമായ സൈബർ ആക്രമണം റിപ്പോർട്ട് ചെയ്തിട്ടുണ്ട്. യു.എസ് കോടതികളിൽ നിന്ന് ഡ്രൈവിംഗ് ലൈസൻസ് നമ്പറുകൾ, സോഷ്യൽ സെക്യൂരിറ്റി നമ്പറുകൾ, വൈദ്യപരിശോധനാ രേഖകൾ എന്നിവ ചോർന്നതായി കണ്ടെത്തിയിട്ടുണ്ട്.​സംഭവത്തിൽ അന്വേഷണം തുടരുകയാണെന്നും ബാധിക്കപ്പെട്ട വ്യക്തികളെ സഹായിക്കുന്നതിനായി പ്രത്യേക വെബ്‌സൈറ്റും കാൾ സെന്റർ സേവനവും തത്സമയ ക്രെഡിറ്റ് മോണിറ്ററിംഗ് സംവിധാനവും തോംസൺ റൂയിട്ടേഴ്‌സ് ഏർപ്പെടുത്തിയിട്ടുണ്ടെന്നും പ്രവിശ്യാ കോടതി അധികൃതർ വ്യക്തമാക്കി. നീതിന്യായ വ്യവസ്ഥയോടുള്ള ജനങ്ങളുടെ വിശ്വാസ്യത നിലനിർത്തുന്നതിനും ഭാവിയിൽ ഇത്തരം സുരക്ഷാവീഴ്ചകൾ ആവർത്തിക്കാതിരിക്കുന്നതിനും സർക്കാരുമായി ചേർന്ന് കർശന നടപടികൾ സ്വീകരിക്കുമെന്നും ചീഫ് ജസ്റ്റിസുമാർ അറിയിച്ചു.