കാനഡയിൽ ആദ്യ ദേശീയ നിക്ഷേപ ഉച്ചകോടിക്ക് തുടക്കം: ശതകോടികളുടെ പദ്ധതിപ്രഖ്യാപനങ്ങളും നികുതി നയമാറ്റങ്ങളും

ടൊറന്റോ, കാനഡ: രാജ്യത്തേക്ക് ഒരു ട്രില്യൺ ഡോളറിന്റെ പുതിയ നിക്ഷേപങ്ങൾ ആകർഷിക്കുകയെന്ന വൻ ലക്ഷ്യത്തോടെ കാനഡ സംഘടിപ്പിക്കുന്ന ആദ്യ ദേശീയ നിക്ഷേപ ഉച്ചകോടിക്ക് ടൊറന്റോയിൽ തുടക്കമായി. ഉച്ചകോടിയുടെ ആദ്യദിനത്തിൽ തന്നെ ശതകോടി ഡോളറുകളുടെ പ്രഖ്യാപനങ്ങളും വൻകിട നിക്ഷേപകരെ ആകർഷിക്കുന്നതിനുള്ള സുപ്രധാന നികുതി നയമാറ്റങ്ങളും ഭരണകൂടം പുറത്തുവിട്ടു. അടുത്ത അഞ്ച് വർഷത്തിനുള്ളിൽ കനേഡിയൻ സമ്പദ്‌വ്യവസ്ഥയിലേക്ക് വൻതോതിൽ മൂലധനമൊഴുക്കുക എന്ന ലക്ഷ്യത്തോടെ പ്രധാനമന്ത്രി മാർക്ക് കാർണിയാണ് ഉച്ചകോടി ഉദ്ഘാടനം ചെയ്തത്. രാജ്യത്തെ പ്രമുഖ വ്യവസായ പ്രമുഖരും അന്താരാഷ്ട്ര അസറ്റ് മാനേജർമാരും ഉൾപ്പെടെ നൂറുകണക്കിന് പ്രതിനിധികളാണ് ഉച്ചകോടിയിൽ പങ്കെടുക്കുന്നത്.​കാനഡയിലേക്ക് നൂറ് കോടി ഡോളറോ അതിൽ കൂടുതലോ നിക്ഷേപിക്കുന്ന വൻകിട നിക്ഷേപകർക്ക് ആദായനികുതി നിയമങ്ങളുടെ പ്രയോഗത്തിൽ വ്യക്തത നൽകുന്ന പ്രത്യേക മുൻഗണനാ സൗകര്യം ഏർപ്പെടുത്തിയതാണ് കേന്ദ്ര സർക്കാറിന്റെ പ്രധാന പ്രഖ്യാപനം. കാനഡ റെവന്യൂ ഏജൻസിയുടെ ‘അഡ്വാൻസ് ഇൻകം ടാക്സ് റൂളിംഗ്സ്’ പ്രോഗ്രാം വഴി നിക്ഷേപം നടത്തുന്നതിന് മുമ്പ് തന്നെ നികുതിപരമായ കാര്യങ്ങളിൽ വ്യക്തത ഉറപ്പാക്കാൻ ഇതിലൂടെ സാധിക്കും. കൂടാതെ, ചർച്ചിൽ തുറമുഖ മേഖലയിലേക്ക് അന്താരാഷ്ട്ര നിക്ഷേപകരെ ആകർഷിക്കുന്നതിനായി പ്രൊവിൻഷ്യൽ സെയിൽസ് ടാക്സ് ഒഴിവാക്കുമെന്ന് മാനിറ്റോബ പ്രവിശ്യയും വ്യക്തമാക്കിയിട്ടുണ്ട്.​ഉച്ചകോടിക്ക് സമാന്തരമായി രാജ്യത്തെ മുൻനിര ബാങ്കുകളും വൻതുകയുടെ വായ്പാ-നിക്ഷേപ പദ്ധതികൾ പ്രഖ്യാപിച്ചിട്ടുണ്ട്. അടുത്ത അഞ്ച് വർഷത്തിനുള്ളിൽ ഊർജ്ജം, നിർണായക ധാതുക്കൾ, ഇൻഫ്രാസ്ട്രക്ചർ, പ്രതിരോധം, ബഹിരാകാശം എന്നീ മേഖലകളിൽ 150 ശതകോടി ഡോളറിന്റെ നിക്ഷേപ പിന്തുണ നൽകുമെന്ന് ടിഡി ബാങ്ക് സിഇഒ റെയ്മണ്ട് ചുൻ അറിയിച്ചു. സമാനമായി, സ്കോട്ടിയാ ബാങ്ക് നൂറ് ശതകോടി ഡോളറിലധികം സാമ്പത്തിക സഹായവും ബിസിനസ് വളർച്ചയ്ക്കായി പുതിയ ഗവേഷണ പ്ലാറ്റ്‌ഫോമും പ്രഖ്യാപിച്ചിട്ടുണ്ട്.​സാങ്കേതികവിദ്യ, ഊർജ്ജ മേഖലകളിൽ വൻ കുതിച്ചുചാട്ടമുണ്ടാക്കുന്ന അടിസ്ഥാനസൗകര്യ വികസന പദ്ധതികളും ഉച്ചകോടിയിൽ ശ്രദ്ധനേടി. സാസ്കാച്ചെവനിൽ ബെൽ കാനഡ നടപ്പിലാക്കുന്ന ആർട്ടിഫിഷ്യൽ ഇന്റലിജൻസ് ഡാറ്റാ സെന്റർ പദ്ധതിയുടെ വിപുലീകരണത്തിനായി 50 ശതകോടി ഡോളറിലധികം നിക്ഷേപം പ്രതീക്ഷിക്കുന്നതായി സസ്കാച്ചെവൻ പ്രീമിയർ സ്കോട്ട് മോയും ബെൽ സിഇഒ മിർക്കോ ബിബിച്ചും അറിയിച്ചു. പ്രവിശ്യാ ചരിത്രത്തിലെ തന്നെ ഏറ്റവും വലിയ സ്വകാര്യ നിക്ഷേപങ്ങളിലൊന്നായ ഈ പദ്ധതിയിലൂടെ മൂവായിരത്തിലധികം തൊഴിലവസരങ്ങൾ സൃഷ്ടിക്കപ്പെടുമെന്നാണ് വിലയിരുത്തപ്പെടുന്നത്