സ്മാർട്ട് ടിവികൾ സ്വകാര്യ സംഭാഷണങ്ങൾ ചോർത്തുന്നെന്ന വാർത്ത തള്ളി എൽജി; പ്രചാരണം വസ്തുതാവിരുദ്ധമെന്ന് വിശദീകരണം

സീയോൾ, ദക്ഷിണ കൊറിയ: തങ്ങളുടെ സ്മാർട്ട് ടെലിവിഷനുകൾ ഉപയോക്താക്കളുടെ വ്യക്തിഗത സംഭാഷണങ്ങൾ ചോർത്തുന്നുവെന്ന വാർത്തകൾ നിഷേധിച്ച് പ്രമുഖ ഇലക്ട്രോണിക്സ് നിർമ്മാതാക്കളായ എൽജി (LG). ടെലിവിഷനിൽ പരസ്യങ്ങൾ നൽകുന്നതിനായി വീടുകളിലെ അന്തരീക്ഷ ശബ്ദങ്ങളും സ്വകാര്യ സംഭാഷണങ്ങളും റെക്കോർഡ് ചെയ്യുന്നുവെന്ന ആരോപണങ്ങൾ തികച്ചും അടിസ്ഥാനരഹിതമാണെന്ന് എൽജി ഔദ്യോഗിക പ്രസ്താവനയിലൂടെ വ്യക്തമാക്കി. തങ്ങളുടെ സ്മാർട്ട് ടിവികൾ ഉപയോക്താക്കൾ ആവശ്യപ്പെടുമ്പോൾ മാത്രമാണ് ശബ്ദ വിവരങ്ങൾ പ്രോസസ്സ് ചെയ്യുന്നതെന്നും കമ്പനി വിശദീകരിച്ചു.​എൽജിയുടെ ജി5 ഒഎൽഇഡി (LG G5 OLED) ടിവികളിൽ മാൻ-ഇൻ-ദി-മിഡിൽ (man-in-the-middle) ഹാക്കിംഗ് നടത്തി ഉപയോക്താക്കളുടെ സംഭാഷണങ്ങൾ ചോർത്താൻ സാധിക്കുമെന്ന് ഗേമേഴ്‌സ് നെക്സസ് (GamersNexus) എന്ന ടെക് ഗവേഷണ സംഘം ചൂണ്ടിക്കാണിച്ചിരുന്നു. ടെലിവിഷനിലെ മൈക്രോഫോൺ ഫിസിക്കലായി ഓഫ് ചെയ്തു വെച്ചാലും എച്ച്ഡിഎംഐ അല്ലെങ്കിൽ വെബ്ക്യാം വഴി ശബ്ദങ്ങൾ ചോർത്താനാകുമെന്നായിരുന്നു ഇവരുടെ കണ്ടെത്തൽ. എന്നാൽ, റിമോട്ട് കൺട്രോളിലെ വോയ്‌സ് ബട്ടൺ അമർത്തിപ്പിടിക്കുമ്പോഴോ അല്ലെങ്കിൽ ‘ഹായ് ടിവി’ പോലുള്ള കൃത്യമായ വേക്ക് വേഡ് (Wake word) പറയുമ്പോഴോ മാത്രമേ വോയ്‌സ് ഡാറ്റ ടിവികൾ ശേഖരിക്കുന്നുള്ളൂവെന്ന് എൽജി വക്താവ് വ്യക്തമാക്കി.​ഇത്തരത്തിൽ വേക്ക് വേഡ് അല്ലാത്ത മറ്റ് സംഭാഷണങ്ങളൊന്നും ടിവികൾ റെക്കോർഡ് ചെയ്യുകയോ എൽജിയുടെ സെർവറുകളിലേക്ക് അയക്കുകയോ ചെയ്യുന്നില്ലെന്ന് കമ്പനി കൂട്ടിച്ചേർത്തു. വേക്ക് വേഡ് തിരിച്ചറിഞ്ഞില്ലെങ്കിൽ ആ ശബ്ദ ഡാറ്റ ഉടനടി ഉപകരണത്തിൽ നിന്ന് നീക്കം ചെയ്യപ്പെടും. ഓട്ടോമാറ്റിക് കണ്ടന്റ് റെക്കഗ്നിഷൻ (ACR) സാങ്കേതികവിദ്യ വഴി പരസ്യ ലക്ഷ്യങ്ങൾക്കായി വിവരങ്ങൾ ശേഖരിക്കുന്നുണ്ടെങ്കിലും സംഭാഷണങ്ങൾ ചോർത്തുന്നുവെന്ന വാദം തെറ്റാണെന്ന് വ്യക്തമാക്കി ഉപയോക്താക്കളുടെ സ്വകാര്യതയ്ക്ക് എൽജി പൂർണ്ണ സംരക്ഷണം ഉറപ്പുനൽകുന്നു.