കനേഡിയൻ സർക്കാർ ജോർഡൻസ് പ്രിൻസിപ്പിൾ എന്ന പദ്ധതിയിൽ പുതിയ നിയന്ത്രണങ്ങൾ കൊണ്ടുവന്നിരിക്കുന്നു. ഇനി മുതൽ വെക്കേഷൻ, ഉയർന്ന തലത്തിലുള്ള കായികപരിശീലനം, സ്വകാര്യ സ്കൂൾ ഫീസ്, പുതിയ വീടുകളുടെ നിർമ്മാണം, പുതിയ ഫർണിച്ചർ, വാഹനങ്ങൾ എന്നിവയ്ക്കുള്ള ഫണ്ടിംഗ് അനുവദിക്കില്ല. പദ്ധതിയുടെ ഉദ്ദേശ്യത്തെ കൂടുതൽ വ്യക്തതയോടെ നടപ്പിലാക്കുന്നതിനാണ് ഈ മാറ്റങ്ങൾ. സർക്കാർ വ്യക്തമാക്കിയതനുസരിച്ച്, ആവശ്യമായ ആരോഗ്യപരമായ സേവനങ്ങൾ, വിദ്യാഭ്യാസം, സാമൂഹിക സഹായങ്ങൾ എന്നിവയ്ക്കായാണ് പദ്ധതി ആവിഷ്കരിച്ചത്, അതിനാലാണ് ആഡംബര ചെലവുകൾ ഒഴിവാക്കാൻ നടപടി സ്വീകരിച്ചത്.
ഇൻഡിജിനസ് സർവീസസ് മന്ത്രി പാറ്റി ഹൈഡു (Patty Hajdu) ചെയ്ത വിശദീകരണമനുസരിച്ച്, 2021 മുതൽ 2024 വരെ ജോർഡൻസ് പ്രിൻസിപ്പിൾ വഴി ഫണ്ടിംഗിനായുള്ള അപേക്ഷകളുടെ എണ്ണം 367% വർദ്ധിച്ചു, ഇതുമൂലം ഫണ്ട് ഉപയോഗത്തിന്റെ മുൻഗണനകൾ പുനർനിർണയിക്കാൻ സർക്കാർ തീരുമാനിച്ചു. 2016-ൽ പദ്ധതി വ്യാപിപ്പിച്ചശേഷം മൊത്തം $9 ബില്യൺ കനേഡിയൻ ഡോളർ ഫണ്ട് വിതരണം ചെയ്തിട്ടുണ്ട്.
ജോർഡൻസ് പ്രിൻസിപ്പിൾ എന്താണ്?
ജോർഡൻസ് പ്രിൻസിപ്പിൾ നോർവേ ഹൗസ് ക്രീ നേഷൻ (Norway House Cree Nation) ദേശകാരൻ ആയ ജോർഡൻ റിവർ ആൻഡേഴ്സൺ എന്ന കുട്ടിയുടെ ഓർമ്മയ്ക്കായി രൂപീകരിച്ച പദ്ധതിയാണ്. ദുര്ലഭമായ ഒരു ജനിതക രോഗം ബാധിച്ച ജോർഡൻ, പ്രോവിൻസും ഫെഡറൽ സർക്കാരും ആരോഗ്യ സേവനങ്ങളുടെ ചെലവ് ആരാണ് വഹിക്കണമെന്ന് തർക്കം നടത്തുന്നതിനിടയിൽ വീട്ടിലേക്കു പോകാൻ കഴിയാതെ ആശുപത്രിയിലാണ് ജീവിതം മുഴുവൻ കഴിച്ചുകൂട്ടിയത്. ജോർഡൻ 2005ൽ തന്റെ അഞ്ചാം വയസ്സിൽ ഒരു ദിവസം പോലും വീട്ടിൽ ചെലവഴിക്കാനാവാതെ മരണപ്പെട്ടു.
ജോർഡാൻ്റെ അനുഭവം ആവർത്തിക്കാതിരിക്കാൻ ഫണ്ടിംഗുമായി ബന്ധപ്പെട്ട ഭരണംപരമായ തർക്കങ്ങൾ ഉണ്ടാകുമ്പോൾ, ഫസ്റ്റ് നേഷൻ (First Nations) കുട്ടികൾക്ക് വേണ്ട സേവനങ്ങൾ ഉടൻ നൽകുകയും പിന്നീടു സർക്കാർ അന്തിമ ധാരണയിൽ എത്തുകയും ചെയ്യണം എന്ന ഉദ്ദേശ്യത്തോടെയാണ് ഈ പദ്ധതി നിലവിൽ വന്നത്.
പുതിയ മാറ്റങ്ങൾ പ്രകാരം ചില ചെലവുകൾ ഇനി അനുവദിക്കില്ലെങ്കിലും, ആരോഗ്യം, വിദ്യാഭ്യാസം, സാമൂഹിക സേവനങ്ങൾ എന്നിവയുടെ അടിസ്ഥാനസഹായം തുടരുമെന്ന് സർക്കാർ ഉറപ്പ് നൽകി.
