ഒന്റാരിയോ പ്രീമിയർ ഡഗ് ഫോർഡും അദ്ദേഹത്തിന്റെ പ്രോഗ്രസ്സീവ് കൺസർവേറ്റീവ് പാർട്ടിയും മൂന്നാം തവണയും ഭൂരിപക്ഷം നേടി. ഈ വിജയത്തോടെ, ഫോർഡ് സർക്കാർ പ്രൊവിൻസിന്റെ ഭാവി രൂപപ്പെടുത്തുന്നതിനുള്ള പദ്ധതികൾക്കൊരുങ്ങുകയാണ്.
തൊഴിൽ അവസരങ്ങളും തൊഴിൽ വികസനവും
ഫോർഡ് സർക്കാർ ഒന്റാറിയോയിലെ തൊഴിലാളികൾക്കും കുടുംബങ്ങൾക്കും സംരക്ഷണം നൽകുന്ന ഒരു വലിയ പദ്ധതി മുന്നോട്ടു വെക്കുന്നു. $40 ബില്യൺ ചെലവഴിച്ചുള്ള പദ്ധതിയിലൂടെ തൊഴിൽ സൃഷ്ടിക്കും, അതുപോലെ തൊഴിൽ വിപുലീകരണവും ഉണ്ടാകും. ഒരു ദശലക്ഷത്തിലധികം തൊഴിലാളികളെ പരിശീലിപ്പിക്കാൻ $2.5 ബില്യൺ സ്കിൽ ഡവലപ്മെന്റ് ഫണ്ടിൽ ഉൾപ്പെടുത്തും. അതോടൊപ്പം, വേഗത്തിൽ ആവശ്യമായ തൊഴിൽ മേഖലകളിലേക്ക് തൊഴിൽ ആകർഷിക്കാൻ $100 മില്യൺ ‘Better Jobs Ontario’ പ്രോഗ്രാമിനായി വിനിയോഗിക്കും. പബ്ലിക് കോളജുകളും യൂണിവേഴ്സിറ്റികളിലെ പരിശീലന സൗകര്യങ്ങൾ വർധിപ്പിക്കാൻ $705 മില്യൺ ചെലവഴിക്കും, ഇതിൽ $405 മില്യൺ സയൻസ്, ടെക്നോളജി, എൻജിനീയറിംഗ്, മാസ്ത്സ് (STEM) പഠനത്തിനായിരിക്കും.
യാത്രാ സൗകര്യങ്ങൾക്കും റോഡ് വികസനത്തിനും മാറ്റങ്ങൾ
ഫോർഡ് വലിയ ഗതാഗത മാറ്റങ്ങൾ വാഗ്ദാനം ചെയ്യുന്നു. Highway 413 എന്ന 52-കിലോമീറ്റർ ദൈർഘ്യമുള്ള പുതിയ പാത നിർമ്മാണം ആരംഭിച്ചിട്ടുണ്ട്. കൂടാതെ, Highway 401-ന് കീഴിൽ ഒരു അണ്ടർഗ്രൗണ്ട് എക്സ്പ്രസ് വേ നിർമ്മിച്ച് യാത്രക്കാർക്ക് കൂടുതൽ വേഗത്തിൽ ഗതാഗതം സാധ്യമാക്കും. പ്രവിശ്യയിലെ ഹൈവേകളിൽ പരമാവധി വേഗപരിധി 110 കിമി/മണിക്കൂർ ആക്കുമെന്നും, ടൊറന്റോയിലെ പ്രധാന റോഡുകളിൽ നിന്നുള്ള ബൈക്ക് പാത്തുകൾ നീക്കം ചെയ്യുമെന്നും പ്രഖ്യാപിച്ചിട്ടുണ്ട്. “GO 2.0” പദ്ധതിയിലൂടെ മിഡ്ടൗൺ ടൊറന്റോ, യോർക്ക് റീജിയൻ, ബോൾട്ടൺ എന്നിവിടങ്ങളിൽ പുതിയ ട്രെയിൻ സർവീസുകൾ തുടങ്ങും, ഇതിലൂടെ യാത്രക്കാരുടെ സൗകര്യം മെച്ചപ്പെടുത്താൻ ലക്ഷ്യമിടുന്നു.
ആരോഗ്യ രംഗത്ത് കൂടുതൽ നിക്ഷേപം
ഒന്റാരിയോയിലെ ആരോഗ്യ മേഖലയിൽ ഇതുവരെ ഉണ്ടായിട്ടുള്ള ഏറ്റവും വലിയ വെല്ലുവിളികളിലൊന്നാണ് ആശുപത്രികളിലെ വൈകിയ ചികിത്സ, കുടുംബ ഡോക്ടർമാരുടെ കുറവ് തുടങ്ങിയ പ്രശ്നങ്ങൾ. ഇത് പരിഹരിക്കാൻ ഫോർഡ് സർക്കാർ 2024-25 വർഷത്തേക്കായി $85 ബില്യൺ ആരോഗ്യമേഖലയിൽ ചെലവഴിക്കുമെന്നു പ്രഖ്യാപിച്ചു. 50 പുതിയ ആശുപത്രികൾ നിർമ്മിക്കാനും നിലവിലുള്ളവ മെച്ചപ്പെടുത്താനും $50 ബില്യൺ നീക്കി. 2029 ഓടെ 2 ദശലക്ഷം ആളുകളെ കുടുംബ ഡോക്ടർമാരുമായി ബന്ധിപ്പിക്കാനാണ് സർക്കാർ ലക്ഷ്യം. അതിനായി $743 മില്യൺ ആരോഗ്യപ്രവർത്തകരെ നിയമിക്കാൻ ഉപയോഗിക്കും. കൂടാതെ, മാനസികാരോഗ്യ സേവനങ്ങളും ലഹരി ചികിത്സാ കേന്ദ്രങ്ങളും മെച്ചപ്പെടുത്താൻ $530 മില്യൺ ചെലവഴിക്കുമെന്നും സർക്കാർ അറിയിച്ചു.
ഈ വാഗ്ദാനങ്ങൾ എല്ലാം നടപ്പാകുമോ എന്നത് അടുത്ത വർഷങ്ങളിൽ വ്യക്തമാകും. എന്നാൽ, തൊഴിൽ, ഗതാഗതം, ആരോഗ്യരംഗം എന്നിവയിൽ വലിയ മാറ്റങ്ങൾ കൊണ്ടുവരാൻ ഡഗ് ഫോർഡ് സർക്കാരിന് പദ്ധതിയുണ്ടെന്ന് മനസ്സിലാക്കേണ്ടത്. പ്രൊവിൻസിന്റെ ഭാവി രൂപപ്പെടുത്തുന്ന ഈ നിർണായക തീരുമാനങ്ങൾ ഒന്റാറിയോ നിവാസികൾ ഉറ്റുനോക്കും.
