“ഒരു പറ ചോറുണ്ണാൻ ഈ കറി മാത്രം മതി” എന്ന് പല ‘ന്യൂ ജനറേഷൻ’ ഫുഡ് വ്ളോഗർമാരും സമൂഹ മാധ്യമങ്ങളിൽ ഘോരഘോരം പ്രഘോഷിക്കുന്നത് നാം കേട്ടിട്ടുണ്ടാകും.
പ്ലേറ്റിൽ ചോറിനേക്കാൾ കൂടുതൽ കറികളും സാലഡുകളും മറ്റും കണ്ടാൽ “ഇതിൽ ചോറെവിടെ” എന്ന ‘കമെന്റുകളും’ നാം കാണാറുണ്ട്. .
യഥാർത്ഥത്തിൽ, കുറെ ചോറുണ്ണാൻ ഉള്ള ‘സൈഡ് ഡിഷുകൾ’ മാത്രം അല്ല അനുബന്ധ വിഭവങ്ങൾ.
എന്താണ് സമീകൃത ഭക്ഷണം?
അന്നജം (കാർബോഹൈഡ്രേറ്റ്), കൊഴുപ്പ് (ഫാറ്റ്), മാംസ്യം (പ്രോട്ടീൻ) എന്നിവ കൂടാതെ വൈറ്റമിൻസ്, ധാതുക്കൾ (മിനറൽസ്), ആന്റി ഓക്സിഡന്റുകൾ, ഫൈറ്റോകെമിക്കൽസ്, നാരുകൾ (ഡയറ്ററി ഫൈബർ) തുടങ്ങിയ പോഷകങ്ങൾ ഉൾപ്പെടെ നമ്മുടെ ശരീരത്തിന് ആവശ്യമായ എല്ലാ പോഷകങ്ങളും ആവശ്യമായ അളവിൽ അടങ്ങിയിരിക്കുന്ന ഭക്ഷണമാണ് സമീകൃതഭക്ഷണം.
സമീകൃത ഭക്ഷണത്തിന്റെ പ്രാധാന്യമെന്ത്?
ജോലിയുടെയും സ്വകാര്യജീവിതത്തിന്റെയും തിരക്കുകൾക്കിടയിൽ പല പ്രവാസികളും സമീകൃത ഭക്ഷണത്തിന്റെ പ്രാധാന്യത്തെക്കുറിച്ഛ് ചിന്തിക്കുന്നത് വിരളമായിരിക്കും. സമീകൃത ഭക്ഷണത്തിനു നമ്മുടെ ആരോഗ്യ പരിപാലനത്തിനുള്ള പ്രാധാന്യം മനസ്സിലാക്കിയാൽ സമൂഹത്തിൽ ഭൂരിഭാഗവും സമീകൃത ഭക്ഷണ രീതി പിന്തുടരാൻ സമയം കണ്ടെത്തിയേക്കാം.
സമീകൃത ഭക്ഷണം നമ്മുടെ ശരീരത്തിന് ഫലപ്രദമായി പ്രവർത്തിക്കാൻ ആവശ്യമായ പോഷകങ്ങൾ നൽകുന്നു. കൂടാതെ, രോഗപ്രതിരോധ ശേഷി (ഇമ്മ്യൂണിറ്റി) വർദ്ധിപ്പിക്കുവാനും, പ്രമേഹം (ഡയബെറ്റിസ്), ഉയർന്ന രക്തസമ്മർദ്ദം (ഹൈപ്പർടെൻഷൻ), ഹൃദ്രോഗം (ഹാർട്ട് ഡിസീസ്) തുടങ്ങിയ ജീവിതശൈലി രോഗങ്ങൾ (ലൈഫ്സ്റ്റൈൽ ഡിസീസസ്) അകറ്റി നിറുത്തുവാനും മാനസിക ആരോഗ്യം കാത്തു സൂക്ഷിക്കുവാനും സമീകൃത ഭക്ഷണ രീതി അത്യന്താപേക്ഷിതമാണ്.
ഭക്ഷണം എങ്ങനെ സമീകൃതമാക്കാം?
ഭക്ഷണത്തിന്റെ പകുതിഭാഗവും വിവിധ പച്ചക്കറികൾ കൊണ്ടുള്ള കറികൾ ആയിരിക്കണം. അരിയോ മറ്റു ധാന്യങ്ങളോ കൊണ്ടുള്ള ഭക്ഷണ പദാർഥങ്ങൾ ഭക്ഷണത്തിന്റെ കാൽഭാഗം മാത്രം മതി. മത്സ്യം, മുട്ട, ഇറച്ചി, പയറുവർഗ്ഗങ്ങൾ മുതലായ ഉയർന്ന തോതിൽ മാംസ്യം അടങ്ങിയ വിഭവങ്ങൾ ഭക്ഷണത്തിന്റെ കാൽഭാഗം ഉണ്ടായിരിക്കേണ്ടതാണ്.
ഈ രീതിയിൽ, നമുക്ക് നാം കഴിക്കുന്ന ഭക്ഷണം സമീകൃതമാക്കാം, ആരോഗ്യം പരിരക്ഷിക്കാം.
