കാനഡയിലെ പൊതുപാർക്കുകളിലും ജിമ്മുകളിലും, കുട്ടികൾക്ക് പരിശീലനം നൽകുന്ന മാർഷ്യൽ ആർട്സ് ക്ലബ്ബുകളിൽ പോലും, വെള്ളക്കാരുടെ ആധിപത്യവാദികളും(white supremacist) നിയോ-നാത്സി അനുയായികളും അക്രമാസക്തമായ പ്രവർത്തനങ്ങൾക്കായി പരിശീലനം നടത്തുന്നതായി കാനഡയിലെ പ്രമുഖ മാധ്യമമായ CBC റിപ്പോർട്ട് ചെയ്യുന്നു. “ആക്റ്റീവ് ക്ലബ്ബുകൾ” എന്നറിയപ്പെടുന്ന ഈ ഗ്രൂപ്പുകൾ, വെള്ളക്കാരുടെ സംസ്കാരവും പൈതൃകവും സംരക്ഷിക്കുക എന്ന പേര് പറഞ്ഞ്, യുവാക്കളെ ആകർഷിക്കുകയും അവരെ തീവ്രവാദ പ്രവർത്തനങ്ങളിലേക്ക് നയിക്കുകയും ചെയ്യുന്നു. CBC-യുടെ വിഷ്വൽ ഇൻവെസ്റ്റിഗേഷൻ ടീമിന്റെ മാസങ്ങളോളം നീണ്ട അന്വേഷണത്തിന്റെ ഫലമായാണ് ഈ ഞെട്ടിക്കുന്ന വിവരങ്ങൾ പുറത്തുവന്നത്.
എന്താണ് “ആക്റ്റീവ് ക്ലബ്ബുകൾ” ?
“ആക്റ്റീവ് ക്ലബ്ബുകൾ” എന്നത് വെള്ളക്കാരുടെ ആധിപത്യവാദവും നിയോ-നാത്സി ആശയങ്ങളും പ്രോത്സാഹിപ്പിക്കുന്ന, വികേന്ദ്രീകൃതമായ ഒരു ശൃംഖലയാണ്. ഈ ഗ്രൂപ്പുകൾ ഫിറ്റ്നസിന്റെയും മാർഷ്യൽ ആർട്സ് പരിശീലനത്തിന്റെയും മറവിൽ യുവാക്കളെ റിക്രൂട്ട് ചെയ്യുകയും, വർഗീയ യുദ്ധത്തിന് (race war) തയ്യാറെടുക്കുകയും ചെയ്യുന്നു. ഈ ഗ്രൂപ്പുകൾ 2017-ൽ അമേരിക്കയിൽ റോബർട്ട് റുണ്ടോ എന്ന വ്യക്തി “റൈസ് എബവ് മൂവ്മെന്റ്” (Rise Above Movement) എന്ന പേര് നൽകി ആരംഭിച്ചതാണ്. പിന്നീട് ഇത് കാനഡ, യൂറോപ്പ്, ഓസ്ട്രേലിയ എന്നിവിടങ്ങളിലേക്ക് വ്യാപിച്ചു. 2024 ഡിസംബറിൽ റുണ്ടോയെ കാലിഫോർണിയയിൽ അക്രമാസക്തമായ കലാപങ്ങൾ ആസൂത്രണം ചെയ്തതിന് രണ്ട് വർഷത്തെ തടവിന് ശിക്ഷിച്ചു.
“നാഷണലിസ്റ്റ്-13” (NS13), “സെക്കൻഡ് സൺസ്” തുടങ്ങിയ ഗ്രൂപ്പുകൾ, തങ്ങളുടെ പ്രവർത്തനങ്ങൾ രഹസ്യമായി നിലനിർത്താൻ ശ്രമിക്കുന്നുണ്ടെങ്കിലും, പൊതു ഇടങ്ങളിലും ജിമ്മുകളിലും പരിശീലനം നടത്തുന്നുണ്ടെന്നാണ് CBC-യുടെ അന്വേഷണം വെളിപ്പെടുത്തുന്നത്. ഈ ഗ്രൂപ്പുകൾ തങ്ങളുടെ സോഷ്യൽ മീഡിയ പോസ്റ്റുകളിൽ മുഖം മറയ്ക്കാനായി “ടോട്ടൻകോപ്ഫ്” (നാത്സി SS – Schutzstaffel- എന്നറിയപ്പെടുന്ന പാരാമിലിറ്ററി വിങ്ങ് ഉപയോഗിച്ചിരുന്ന തലയോട്ടി ചിഹ്നമുള്ള മാസ്ക് ) ഉപയോഗിക്കുന്നു. കൂടാതെ, നാത്സി ചിഹ്നങ്ങളും വിദ്വേഷ പ്രചാരണങ്ങളും ഇവർ പ്രോത്സാഹിപ്പിക്കുന്നു.
കാനഡയിലെ ആക്റ്റീവ് ക്ലബ്ബുകളുടെ വളർച്ച, തീവ്രവാദത്തിന്റെയും വിദ്വേഷ പ്രചാരണത്തിന്റെയും വർദ്ധിച്ചുവരുന്ന ഭീഷണിയെ സൂചിപ്പിക്കുന്നു. ഈ ഗ്രൂപ്പുകൾ, ഫിറ്റ്നസിന്റെയും സമൂഹനിർമ്മാണത്തിന്റെയും മറവിൽ, വർഗീയവും വിദ്വേഷപരവുമായ ആശയങ്ങൾ പ്രചരിപ്പിക്കുന്നു. CBC-യുടെ ഈ അന്വേഷണ റിപ്പോർട്ട്, അത്യന്തം ഗൗരവമുള്ളതും അടിയന്തരമായി സുരക്ഷാ ഏജൻസികളുടെയും, നിയമസംവിധാനങ്ങളുടെയും, സർക്കാരുകളുടെയും ശ്രദ്ധ പതിയേണ്ടതുമായ ഗുരുതര വിഷയത്തിലേക്കാണ് വെളിച്ചം വീശുന്നത്.
