2024 ക്രിസ്തുമസ് രാവിൽ ആഗോള കത്തോലിക്കാ സഭയുടെ ആസ്ഥാനമായ റോമിലെ സെൻ പീറ്റേഴ്സ് ബസിലിക്കയിൽ പരിശുദ്ധ പിതാവ് ഫ്രാൻസിസ് മാർപാപ്പ തുടക്കം കുറിച്ച 2025 ജൂബിലി വർഷത്തിന്റെ മിസിസാഗ രൂപതാതല ഉദ്ഘാടനം രൂപതാധ്യക്ഷൻ അഭിവന്ദ്യ മാർ ജോസ് കല്ലുവേലിൽ പിതാവിന്റെ നേതൃത്വത്തിൽ സെൻറ് അൽഫോൻസാ സീറോ മലബാർ കത്തീഡ്രൽ ഇടവക ദേവാലയത്തിൽ വച്ച് നടന്നു. ജൂബിലി വർഷത്തിനോട് അനുബന്ധിച്ച് തീർത്ഥാടന കേന്ദ്രമായി ഉയർത്തപ്പെട്ട കത്തീഡ്രൽ ഇടവകയിൽ വിശുദ്ധ വാതിൽ (Holy Door) തുറന്ന് അതിലൂടെ ദേവാലയത്തിലേക്ക് പ്രവേശിച്ച് വിശുദ്ധ ബലിയർപ്പിച്ചാണ് 2025 ജൂബിലി വർഷത്തിന് രൂപതയിൽ തുടക്കമായത്. ചടങ്ങിന് മുന്നോടിയായി ഇടവക ദേവാലയത്തിൽ എത്തിച്ചേർന്ന രൂപതാ അധ്യക്ഷനെ, പുരാതന നസ്രാണി പാരമ്പര്യം നിലനിർത്തി ധൂപാർപ്പണം ചെയ്ത് കുരിശും ബൈബിളും നൽകി അസിസ്റ്റൻറ് വികാരി ഫാ. ഫ്രാൻസിസിന്റെയും കൈകാരന്മാരുടെയും മറ്റ് കമ്മിറ്റി അംഗങ്ങളുടെയും നൂറുകണക്കിന് വിശ്വാസികളുടെയും സാന്നിധ്യത്തിൽ ഇടവക വികാരി ഫാ. അഗസ്റ്റിൻ ഔദ്യോഗികമായി സ്വീകരിച്ചു. തുടർന്ന് പ്രത്യാശയുടെ വിശുദ്ധ കവാടത്തിലൂടെ അഭിവന്ദ്യ പിതാവിന്റെ സാന്നിധ്യത്തിൽ ഇടവക സമൂഹം ഒന്നുചേർന്ന് ദേവാലയത്തിലേക്ക് പ്രവേശിക്കുകയും പ്രാർത്ഥന നിർഭരമായ ദിവ്യബലിയിൽ പങ്കെടുക്കുകയും ചെയ്തു. കുർബാനമധ്യേ പ്രത്യാശയുടെ തീർത്ഥാടകരായ ഓരോ വിശ്വാസിയുടെയും അജപാലന ദൗത്യത്തെക്കുറിച്ച് അഭിവന്ദ്യ പിതാവ് എടുത്തു പറയുകയുണ്ടായി. പലവിധ കാരണങ്ങളാൽ നിരാശയിലാകപ്പെട്ടിരിക്കുന്ന ലോക ജനതയ്ക്കും വരും തലമുറയ്ക്കും പ്രത്യാശയുടെ ഒരു പൊൻകിരണം പകർന്നു നൽകുവാൻ ഓരോ വിശ്വാസിക്കും സാധിക്കട്ടെ എന്നും പിതാവ് ഉദ്ബോധിപ്പിച്ചു.
2024 ഡിസംബർ 24ന് പരിശുദ്ധ പിതാവ് ഫ്രാൻസിസ് പാപ്പയാൽ ഔദ്യോഗികമായി ഉദ്ഘാടനം ചെയ്യപ്പെട്ട് തുടക്കം കുറിച്ച 2025 ജൂബിലി വർഷം 2026 ജനുവരി 6-ന് ദനഹാ തിരുനാളോടു കൂടി കത്തോലിക്കാ സഭയിൽ സമാപിക്കും.
