സെന്റ് തോമസ്, ഒന്റാരിയോ, കാനഡ: ഇമിഗ്രേഷൻ, അഭയാർഥി, പൗരത്വ വകുപ്പ് മന്ത്രിയുടെ പാർലമെന്ററി സെക്രട്ടറി പീറ്റർ ഫ്രാഗിസ്കറ്റോസ്, ഫെഡറൽ ബജറ്റ് 2026 ലെ (Budget 2026: Masters of our destiny) പ്രധാന നിക്ഷേപ പദ്ധതികൾ ഒന്റാരിയോയിലെ സെന്റ് തോമസിൽ വിശദീകരിച്ചു. ഹാർവെസ്റ്റ് ഹാൻഡ്സിലെ (Harvest Hands) ജിം കോളിൻസുമായി നടത്തിയ കൂടിക്കാഴ്ചയ്ക്കിടെയായിരുന്നു ഇത്. എല്ലാ വലുപ്പത്തിലുമുള്ള ബിസിനസുകൾക്ക് നിക്ഷേപിക്കാനും വളരാനും സഹായിക്കുകയാണ് ലക്ഷ്യമെന്ന് അദ്ദേഹം പറഞ്ഞു.
ദൈനംദിന പ്രവർത്തനച്ചെലവും വരുമാനവും 2027-28 ഓടെ സന്തുലിതമാക്കുകയെന്ന ലക്ഷ്യം, നിശ്ചയിച്ചതിനേക്കാൾ ഒരു വർഷം മുൻപേ കൈവരിക്കാനുള്ള പാതയിലാണ് ബജറ്റ് രാജ്യത്തെ എത്തിക്കുന്നതെന്ന് സർക്കാർ അവകാശപ്പെടുന്നു. കമ്മി-ജിഡിപി അനുപാതം കുറഞ്ഞുവരുന്ന നിലയിൽ നിലനിർത്തുമെന്നും വ്യക്തമാക്കി. സ്വകാര്യ മൂലധനം സമാഹരിച്ച് ദീർഘകാല വളർച്ചയ്ക്ക് അടിത്തറയിടുന്ന പദ്ധതിയാണിതെന്നാണ് സർക്കാർ വിശദീകരണം.
ജനങ്ങൾക്കായുള്ള നടപടികളിൽ, പത്ത് വർഷത്തിനുള്ളിൽ ഭവനരാഹിത്യം അവസാനിപ്പിക്കാനുള്ള പാത ഒരുക്കുന്നതും ഉൾപ്പെടുന്നു. കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റിന് (Canada Groceries and Essentials Benefit) 2027 സപ്ലിമെന്റ് ചേർക്കും. ഭക്ഷ്യച്ചെലവ് കുറയ്ക്കാൻ ന്യൂട്രീഷൻ നോർത്ത് കാനഡ (Nutrition North Canada) വിപുലീകരിക്കും. കാനഡ കെയർഗിവർ ക്രെഡിറ്റ് (Canada Caregiver Credit) പൂർണമായി റീഫണ്ടബിൾ ആക്കും. മോർട്ട്ഗേജ് വായ്പയിൽ മികച്ച വ്യവസ്ഥകൾ ലഭ്യമാക്കാൻ സഹായിക്കുമെന്നും, പത്ത് ലക്ഷം വീടുകളിൽ ഊർജക്ഷമത വർധിപ്പിക്കുന്ന റെട്രോഫിറ്റുകൾക്ക് പിന്തുണ നൽകി പ്രതിമാസ ഊർജ ബില്ലുകൾ കുറയ്ക്കുമെന്നും ബജറ്റ് പറയുന്നു.
- കുടുംബാംഗങ്ങളെ പരിചരിക്കുന്നവർ: കാനഡ കെയർഗിവർ ക്രെഡിറ്റ് പൂർണമായി റീഫണ്ടബിൾ ആക്കുമെന്ന് ബജറ്റ് പറയുന്നു. പ്രായമായ മാതാപിതാക്കളെയോ ആശ്രിതരെയോ പരിചരിക്കുന്ന മലയാളി കുടുംബങ്ങൾ യോഗ്യതാ മാനദണ്ഡങ്ങളും പ്രാബല്യ തീയതിയും CRA യുടെ ഔദ്യോഗിക അറിയിപ്പിൽ പരിശോധിക്കണം.
- കുറഞ്ഞ വരുമാനമുള്ള കുടുംബങ്ങൾ: കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റിന് 2027 സപ്ലിമെന്റ് ലഭിക്കും. തുകയും അർഹതയും ഇപ്പോൾ വ്യക്തമല്ലാത്തതിനാൽ, നികുതി റിട്ടേൺ കൃത്യമായി ഫയൽ ചെയ്യുന്നതും CRA പ്രഖ്യാപനങ്ങൾ ശ്രദ്ധിക്കുന്നതും ഗുണകരമാകും.
- വീട്ടുടമകൾ: പത്ത് ലക്ഷം വീടുകളിലെ ഊർജക്ഷമത റെട്രോഫിറ്റുകൾക്ക് പിന്തുണ നൽകുമെന്നും മോർട്ട്ഗേജ് വ്യവസ്ഥകൾ മെച്ചപ്പെടുത്തുമെന്നും ബജറ്റ് പറയുന്നു. വീട് വാങ്ങാനോ നവീകരിക്കാനോ ആലോചിക്കുന്നവർ പദ്ധതി വിശദാംശങ്ങൾ Canada.ca യിൽ നിന്ന് അറിഞ്ഞശേഷം തീരുമാനമെടുക്കുന്നതാണ് നല്ലത്.
- കുട്ടികളും യുവാക്കളുമുള്ള കുടുംബങ്ങൾ: 25 വയസ്സിൽ താഴെയുള്ളവർക്ക് ദേശീയ മ്യൂസിയങ്ങളിൽ സ്ഥിരമായി സൗജന്യ പ്രവേശനം ലഭിക്കും. കൂടാതെ ഐസ് റിങ്കുകളും വിനോദ സൗകര്യങ്ങളും മെച്ചപ്പെടുത്താൻ 150 കോടി ഡോളർ വകയിരുത്തിയിട്ടുണ്ട്.
ബിസിനസ് മേഖലയിൽ പ്രൊഡക്ടിവിറ്റി മെഗാ ഡിഡക്ഷൻ (Productivity Mega Deduction), കാനഡ സ്ട്രോങ് ഫണ്ട് (Canada Strong Fund) എന്നീ നികുതി മാറ്റങ്ങളാണ് നിർദേശിക്കുന്നത്. സ്റ്റാർട്ടപ്പുകൾക്കും നവീനാശയക്കാർക്കും വളരാൻ കാനഡ ഗ്രോത്ത് ഇൻസെന്റീവ് (Canada Growth Incentive) വഴി കൂടുതൽ കനേഡിയൻ മൂലധനം ലഭ്യമാക്കും. 2050 ഓടെ വൈദ്യുതി ഗ്രിഡ് ശേഷി ഇരട്ടിയാക്കാനുള്ള കാനഡ ഇലക്ട്രിസിറ്റി സ്ട്രാറ്റജിക്കും ആണവോർജം, നിർണായക ധാതുക്കൾ എന്നിവയിലെ നിക്ഷേപങ്ങൾക്കും ഫണ്ട് നൽകും.
സാംസ്കാരിക, കായിക മേഖലകൾക്കും ബജറ്റിൽ പ്രത്യേക വിഹിതമുണ്ട്. കാനഡ 160 ഫണ്ട്, പുതുക്കിയ കാനഡ സ്ട്രോങ് പാസ് (Canada Strong Pass), 25 വയസ്സിൽ താഴെയുള്ള കുട്ടികൾക്കും യുവാക്കൾക്കും ദേശീയ മ്യൂസിയങ്ങളിൽ സ്ഥിരമായി സൗജന്യ പ്രവേശനം, ഐസ് റിങ്കുകളും വിനോദ സൗകര്യങ്ങളും വികസിപ്പിക്കാൻ 150 കോടി ഡോളർ എന്നിവ ഇതിലുൾപ്പെടുന്നു. ആദിവാസി ജനവിഭാഗങ്ങളുമായുള്ള അനുരഞ്ജനത്തിനായി 5,000 കോടിയിലധികം ഡോളറിന്റെ നിക്ഷേപവും പ്രതിരോധ, സുരക്ഷാ മേഖലകളിലെ ശക്തിപ്പെടുത്തലും പ്രഖ്യാപിച്ചിട്ടുണ്ട്.
ധനമന്ത്രി ഫ്രാൻസ്വാ-ഫിലിപ്പ് ഷാംപെയ്ൻ, നിക്ഷേപം ഉറപ്പാക്കി സ്വന്തം ശക്തിയിലൂന്നി ഭാവി കെട്ടിപ്പടുക്കുകയാണ് ബജറ്റിന്റെ ലക്ഷ്യമെന്ന് പറഞ്ഞു. വിലക്കയറ്റത്തിന്റെ സമ്മർദം അനുഭവിക്കുന്നവർക്ക് ഇന്ന് തന്നെ ജീവിതച്ചെലവ് കുറയ്ക്കാനും നാളേക്ക് ശക്തമായ സമ്പദ്‌വ്യവസ്ഥ ഒരുക്കാനുമുള്ള പദ്ധതിയാണിതെന്ന് ഫ്രാഗിസ്കറ്റോസ് പ്രതികരിച്ചു.
സർക്കാർ പുറത്തുവിട്ട കണക്കുകൾ പ്രകാരം രണ്ടാം പാദത്തിൽ കനേഡിയൻ സമ്പദ്‌വ്യവസ്ഥ 3.3 ശതമാനം വളർന്നു; ഇത് ജി7 രാജ്യങ്ങളിൽ ഏറ്റവും വേഗത്തിലുള്ള വളർച്ചയാണ്. കഴിഞ്ഞ ഒരു വർഷത്തിനിടെ സ്വകാര്യ മേഖലയിൽ 2,14,000 തൊഴിലുകൾ ഉണ്ടായി. തൊഴിലില്ലായ്മ നിരക്ക് 6.5 ശതമാനമായി കുറഞ്ഞു. 2025 ൽ 9,800 കോടി ഡോളറിന്റെ വിദേശ നിക്ഷേപം രാജ്യത്തെത്തി. ഭവനച്ചെലവിനായി വേണ്ടിവരുന്ന കുടുംബവരുമാന വിഹിതം ഏകദേശം നാലിലൊന്ന് കുറഞ്ഞെന്നും, ശിശുപരിപാലനത്തിന്റെ ശരാശരി ചെലവ് 2019 മുതൽ ഏകദേശം 30 ശതമാനം കുറഞ്ഞെന്നും സർക്കാർ പറയുന്നു.
