മാതൃദിന സമ്മാനമായി കിട്ടിയ ലോട്ടറി ടിക്കറ്റിന് 7 കോടി ഡോളർ ജാക്ക്പോട്ട്; കാനഡയിലെ ദമ്പതികൾക്ക് അപൂർവ്വ ഭാഗ്യം

മാതൃദിന സമ്മാനമായി ഭർത്താവ് ഭാര്യയ്ക്ക് നൽകിയ ലോട്ടറി ടിക്കറ്റിന് 7 കോടി കനേഡിയൻ ഡോളറിന്റെ (ഏകദേശം 430 കോടിയിലധികം ഇന്ത്യൻ രൂപ) കൂറ്റൻ ജാക്ക്പോട്ട് സമ്മാനം. കാനഡയിലെ ഒന്റാറിയോയിലുള്ള ബ്രാംപ്ടണിൽ താമസിക്കുന്ന വിൽസ്, ഓഡ്രി ദമ്പതികളാണ് ‘ലോട്ടോ മാക്സ്’ (Lotto Max) നറുക്കെടുപ്പിലൂടെ ഈ വൻ തുക സ്വന്തമാക്കിയത്. ദശാബ്ദങ്ങൾക്ക് മുൻപ് ജമൈക്കയിൽ നിന്ന് യാതൊരു സാമ്പത്തിക പശ്ചാത്തലവുമില്ലാതെ കാനഡയിലേക്ക് കുടിയേറിപ്പാർത്ത ഈ ദമ്പതികളെ തേടി മേയ് 8-ന് നടന്ന നറുക്കെടുപ്പിലാണ് ഈ വലിയ ഭാഗ്യം എത്തിയത്.​മാതൃദിനത്തോട് അനുബന്ധിച്ച് വിൽസ് സമ്മാനിച്ച ‘ലോട്ടോ മാക്സ് ക്വിക്ക് പിക്ക്’ ടിക്കറ്റ്, ഒഎൽജി (OLG) മൊബൈൽ ആപ്പ് വഴി പരിശോധിച്ചപ്പോഴാണ് 70 മില്യൺ ഡോളറിന്റെ സമ്മാനം തങ്ങൾക്കാണെന്ന് ഓഡ്രി തിരിച്ചറിഞ്ഞത്. സ്ക്രീനിൽ തുക കണ്ടപ്പോൾ വിശ്വസിക്കാൻ കഴിയാതെ വന്ന ഓഡ്രി, സംശയത്തോടെ ഭർത്താവിനെ കാണിക്കുകയും തുടർന്നുള്ള പൂജ്യങ്ങളുടെ എണ്ണം കണ്ട് ഇരുവരും അത്ഭുതപ്പെടുകയുമായിരുന്നു. ടിക്കറ്റ് പരിശോധിക്കുന്നതിന് മുൻപ് തന്നെ ബ്രാംപ്ടണിലാണ് സമ്മാനം അടിച്ചതെന്ന വാർത്ത കേട്ട്, മാതാപിതാക്കൾക്കാണ് സമ്മാനം ലഭിച്ചതെന്ന് മകൾ മുൻകൂട്ടി പ്രവചിച്ചിരുന്നതായും ഇരുവരും സന്തോഷത്തോടെ പങ്കുവെച്ചു.​വർഷങ്ങളായി കഠിനാധ്വാനം ചെയ്തും മിതവ്യയം പാലിച്ചും ജീവിച്ചുപോന്ന തങ്ങൾക്ക് ഈ കൂറ്റൻ സമ്മാനം വിശ്വസിക്കാൻ പോലുമാകാത്ത ഒന്നാണെന്ന് ദമ്പതികൾ വ്യക്തമാക്കി. ലഭിച്ച പണം ഉപയോഗിച്ച് ആദ്യ ഘട്ടത്തിൽ കുടുംബാംഗങ്ങളെയും സുഹൃത്തുക്കളെയും സഹായിക്കാനാണ് ഇവർ ലക്ഷ്യമിടുന്നത്. ഇതിനുപുറമേ, തങ്ങളുടെ മാതൃരാജ്യമായ ജമൈക്കയിൽ ഒരു സ്വപ്ന ഭവനം നിർമ്മിക്കാനും, വിന്റേജ് കാറുകൾ വാങ്ങി നവീകരിക്കാനും ഇവർ പദ്ധതിയിടുന്നു. ബ്രാംപ്ടണിലെ സ്റ്റീൽസ് അവന്യൂവിലുള്ള ക്യാൻകോ വൺ സ്റ്റോപ്പ് ഗ്യാസ് സ്റ്റേഷനിൽ നിന്നാണ് ചരിത്രപരമായ ഈ വിജയം കൈവരിച്ച ടിക്കറ്റ് വിൽസ് വാങ്ങിയത്.