മിസിസാഗ, കാനഡ: വീടുകൾ നവീകരിക്കുന്നതിന്റെ പേരിൽ വാടകക്കാരെ നിയമവിരുദ്ധമായി ഒഴിപ്പിക്കുന്നതും (റെനൊവിക്ഷൻ) തുടർന്ന് വാടക നിരക്ക് കുത്തനെ കൂട്ടുന്നതും തടയാൻ കർശന നിയമവുമായി കാനഡയിലെ മിസിസാഗ നഗരസഭ. സെപ്റ്റംബർ ഒന്നു മുതൽ പ്രാബല്യത്തിൽ വരുന്ന പുതിയ ലൈസൻസിങ് നയപ്രകാരം, വലിയ തോതിലുള്ള അറ്റകുറ്റപ്പണികളുടെ പേരിൽ വാടകക്കാരോട് വീടൊഴിയാൻ ആവശ്യപ്പെടുന്ന ഉടമസ്ഥർ നഗരസഭയിൽ നിന്ന് പ്രത്യേക മുനിസിപ്പൽ ലൈസൻസ് നേടിയിരിക്കണം. കെട്ടിട ഉടമകൾ വാടകക്കാരെ ചൂഷണം ചെയ്യുന്നത് തടയാനും താങ്ങാനാവുന്ന നിരക്കിലുള്ള ഭവന ലഭ്യത ഉറപ്പാക്കാനും ലക്ഷ്യമിട്ടാണ് ഈ നീക്കം.പുതിയ ‘റെന്റൽ റിപ്പയേഴ്സ് ആൻഡ് റെനൊവേഷൻസ് ലൈസൻസിങ്’ ചട്ടപ്രകാരം, നവീകരണത്തിനായി വാടകക്കാരെ ഒഴിപ്പിക്കാൻ പ്രൊവിൻഷ്യൽ നോട്ടീസ് (N13) നൽകുന്ന ഉടമസ്ഥർ ഏഴ് ദിവസത്തിനകം മുനിസിപ്പൽ ലൈസൻസിനായി അപേക്ഷിക്കണം. ഒന്റാറിയോ റെസിഡൻഷ്യൽ ടെനൻസീസ് ആക്ട് അനുസരിച്ച് ഒഴിപ്പിച്ചുമാറ്റപ്പെടുന്ന വാടകക്കാർക്ക് അർഹമായ നഷ്ടപരിഹാരം നൽകാനും നിർമാണം നടക്കുന്ന സമയത്ത് കൃത്യമായ വിവരങ്ങൾ അവരെ അറിയിക്കാനും ഉടമകൾ ബാധ്യസ്ഥരാണ്. പരിശോധനകൾ നടത്താൻ മുനിസിപ്പൽ ഉദ്യോഗസ്ഥർക്ക് പൂർണ്ണ അധികാരമുണ്ടായിരിക്കും.അതേസമയം, പുതിയ നിയന്ത്രണങ്ങൾ ചെറുകിട കെട്ടിട ഉടമകളെ പ്രതികൂലമായി ബാധിക്കുമെന്ന് ആശങ്കയുണ്ട്. പെർമിറ്റ് ഫീസുകൾക്കും നിർമാണച്ചെലവുകൾക്കും പുറമെ ലൈസൻസ് കൂടി നിർബന്ധമാക്കുന്നത് റിയൽ എസ്റ്റേറ്റ് മേഖലയിലെ വ്യക്തിഗത നിക്ഷേപകരെ പിന്നോട്ടടിക്കുമെന്ന് ‘സ്മോൾ ഓണർഷിപ്പ് ലാൻഡ്ലോർഡ്സ് ഓഫ് ഒന്റാറിയോ’ അഭിപ്രായപ്പെട്ടു. എന്നാൽ, സാധാരണക്കാരായ വാടകക്കാരുടെ അവകാശങ്ങൾ സംരക്ഷിക്കാനും മുൻകൂട്ടി അറിയിപ്പില്ലാതെ ഒഴിപ്പിക്കുന്നത് തടയാനും ടൊറന്റോ, ഹാമിൽട്ടൺ തുടങ്ങിയ നഗരങ്ങളുടെ മാതൃകയിലുള്ള ഇത്തരം നിയമങ്ങൾ അത്യന്താപേക്ഷിതമാണെന്ന് ടെനന്റ്സ് റൈറ്റ്സ് സംഘടനകൾ വ്യക്തമാക്കുന്നു.
