കാനഡയിൽ പ്രൊവിൻസുകൾ തമ്മിലുള്ള മദ്യവ്യാപാരത്തിന് വ്യാവസായിക ചരിത്രത്തിലാദ്യമായി ഏർപ്പെടുത്തിയിരുന്ന നിയന്ത്രണങ്ങൾ നീക്കി. ഒമ്പത് കനേഡിയൻ പ്രൊവിൻസുകളിലെ പ്രീമിയർമാർ (മുഖ്യമന്ത്രിമാർ) ഒപ്പുവെച്ച ചരിത്രപരമായ കരാർ പ്രകാരം, രാജ്യത്തെ മദ്യനിർമ്മാതാക്കൾക്കും വൈനറികൾക്കും ഡിസ്റ്റിലറികൾക്കും മറ്റ് പ്രൊവിൻസുകളിലെ ഉപഭോക്താക്കൾക്ക് നേരിട്ട് (Direct-to-Consumer) മദ്യം വിൽക്കാൻ അനുമതി ലഭിക്കും. പ്രൊവിൻഷ്യൽ അതിർത്തികൾ കടന്നുള്ള വ്യാപാരത്തിൽ പതിറ്റാണ്ടുകളായി നിലനിന്നിരുന്ന കടുത്ത തടസ്സങ്ങൾ ഇല്ലാതാക്കുന്നതാണ് ഈ തീരുമാനം.
ഓന്റാറിയോ, ആൽബെർട്ട, സസ്കാച്ചെവൻ, മാനിറ്റോബ, ബ്രിട്ടീഷ് കൊളംബിയ, ന്യൂ ബ്രൺസ്വിക്, നോവ സ്കോട്ടിയ, പ്രിൻസ് എഡ്വേർഡ് ഐലൻഡ്, ന്യൂഫൗണ്ട്ലാന്റ് ആന്റ് ലാബ്രഡോർ എന്നീ പ്രൊവിൻസുകളാണ് നിലവിൽ ഈ കരാറിൽ ഒപ്പുവെച്ചിരിക്കുന്നത്. ബ്രിട്ടീഷ് കൊളംബിയ 2027 ഫെബ്രുവരിയോടെ പുതിയ ചട്ടങ്ങൾ പൂർണ്ണമായി പ്രാബല്യത്തിൽ വരുത്തുമെന്ന് അറിയിച്ചിട്ടുണ്ട്. ക്യൂബെക്കും യൂക്കോൺ ടെറിട്ടറിയും ഉടൻ തന്നെ ഇതിന്റെ ഭാഗമാകുമെന്നാണ് പ്രതീക്ഷിക്കുന്നത്. എന്നാൽ, പ്രാദേശിക സമൂഹങ്ങളുടെ സാംസ്കാരിക മൂല്യങ്ങളും മദ്യനിയന്ത്രണങ്ങളും കണക്കിലെടുത്ത് നോർത്ത് വെസ്റ്റ് ടെറിട്ടറീസും നുനാവുടും നിലവിൽ കരാറിൽ നിന്ന് മാറിനിൽക്കുകയാണ്.
കനേഡിയൻ ഉൽപ്പന്നങ്ങൾക്ക് അമേരിക്കൻ പ്രസിഡന്റ് ഡൊണാൾഡ് ട്രംപ് 50 ശതമാനം വരെ കനത്ത തീരുവ (Tariff) ചുമത്തുമെന്ന് പ്രഖ്യാപിച്ച പ്രതികൂല സാഹചര്യത്തിലാണ് പ്രൊവിൻഷ്യൽ ഭരണാധികാരികൾ അടിയന്തരമായി ഇത്തരമൊരു സാമ്പത്തിക തീരുമാനത്തിലെത്തിയത്. കനേഡിയൻ വൈൻ, ബിയർ, സ്പിരിറ്റ്സ് വ്യവസായത്തെ ട്രംപിന്റെ തീരുവ ഭീഷണിയിൽ നിന്ന് സംരക്ഷിക്കുന്നതിനും ആഭ്യന്തര വിപണിയും സാമ്പത്തിക സ്വയംപര്യാപ്തതയും ശക്തിപ്പെടുത്തുന്നതിനും ഈ നീക്കം സഹായിക്കുമെന്ന് ഓന്റാറിയോ പ്രീമിയർ ഡഗ് ഫോർഡ് വ്യക്തമാക്കി.
മുമ്പ് മറ്റ് പ്രൊവിൻസുകളിൽ നിന്നുള്ള മദ്യം വാങ്ങുന്നതിന് ഔദ്യോഗിക ലിക്വർ ബോർഡുകൾ വഴി വലിയ തുക ഫീസും സമയമെടുക്കുന്ന സങ്കീർണ്ണമായ നിയമനടപടിയും ആവശ്യമായിരുന്നു. പുതിയ സംവിധാനം നിലവിൽ വന്നതോടെ ചെറുകിട മദ്യനിർമ്മാതാക്കൾക്ക് തങ്ങളുടെ ഉൽപ്പന്നങ്ങൾ കൂടുതൽ വിപണികളിലേക്ക് വേഗത്തിൽ എത്തിക്കാനും, ഉപഭോക്താക്കൾക്ക് കൂടുതൽ തെരഞ്ഞെടുപ്പുകൾ ലഭ്യമാക്കാനും സാധിക്കും.
