ന്യൂയോർക്ക്, യു.എസ്: നൂറ്റാണ്ടുകളായി ഉപയോഗത്തിലുള്ള മെർക്കേറ്റർ ലോകഭൂപടം (Mercator map) മാറ്റി ആഫ്രിക്കയുടെയും മറ്റ് ഭൂഖണ്ഡങ്ങളുടെയും യഥാർത്ഥ വലുപ്പം പ്രതിഫലിപ്പിക്കുന്ന പുതിയ മാപ്പ് ഉപയോഗിക്കാൻ ഐക്യരാഷ്ട്രസഭയുടെ ജനറൽ അസംബ്ലിയിൽ തീരുമാനം. ടോഗോ അവതരിപ്പിക്കുകയും ആഫ്രിക്കൻ യൂണിയൻ പിന്തുണയ്ക്കുകയും ചെയ്ത ‘കറക്ട് ദി മാപ്പ്’ പ്രമേയത്തിന് അനുകൂലമായി 164 രാജ്യങ്ങൾ വോട്ട് ചെയ്തു. ഫ്രാൻസും ബ്രിട്ടനും ഉൾപ്പെടെയുള്ള ലോകരാജ്യങ്ങൾ ഇതിനെ പിന്തുണച്ചപ്പോൾ, പ്രമേയത്തിനെതിരെ വോട്ട് ചെയ്ത ഏക രാജ്യം അമേരിക്കയാണ്. ആറ് രാജ്യങ്ങൾ വോട്ടെടുപ്പിൽ നിന്ന് വിട്ടുനിന്നു. ലോകത്തിന്റെ സന്തുലിതമായ കാഴ്ച്ചപ്പാടിനെ തിരുത്തുന്ന പഴയ ഭൂപടം മാറ്റി, ഭൂഖണ്ഡങ്ങളുടെ യഥാർത്ഥ വലുപ്പം കാണിക്കുന്ന ‘ഈക്വൽ എർത്ത്’ (Equal Earth) മാപ്പുകൾ ഉപയോഗിക്കാനാണ് ഐക്യരാഷ്ട്രസഭയുടെ പുതിയ നിർദ്ദേശം.
1569-ൽ നാവികർക്ക് സമുദ്രയാത്രകൾ എളുപ്പമാക്കുന്നതിനായി ഫ്ലെമിഷ് ഭൂപട നിർമ്മാതാവായ ജെറാർഡസ് മെർക്കേറ്റർ രൂപകൽപ്പന ചെയ്തതാണ് നിലവിലെ മെർക്കേറ്റർ പ്രൊജക്ഷൻ. ഭൂമധ്യരേഖയ്ക്ക് സമീപമുള്ള ആഫ്രിക്ക ഉൾപ്പെടെയുള്ള രാജ്യങ്ങളെ വളരെ ചെറുതായും, ഉത്തര ധ്രുവത്തിന് അടുത്തുള്ള രാജ്യങ്ങളെ വലുതായും കാണിക്കുന്നതാണ് ഈ മാപ്പിന്റെ പ്രധാന പോരായ്മ. ഉദാഹരണത്തിന്, ആഫ്രിക്കയെക്കാൾ 14 മടങ്ങ് ചെറുതായ ഗ്രീൻലാൻഡിന് മാപ്പിൽ ആഫ്രിക്കയുടെ അത്രയും തന്നെ വലുപ്പമാണ് നൽകിയിട്ടുള്ളത്. ഇത്തരം ഭൂപടങ്ങൾ ആഫ്രിക്കൻ ഭൂഖണ്ഡത്തെ വളരെ ചെറുതായി കാണിക്കാനും അവരുടെ വിഭവങ്ങളെയും നിക്ഷേപ സാധ്യതകളെയും ലോകത്തിന് മുന്നിൽ കുറച്ചുകാണിക്കാനും കാരണമാകുന്നു എന്ന് കാലങ്ങളായി വിമർശനമുണ്ട്.
ഭൂഖണ്ഡങ്ങളുടെ യഥാർത്ഥ അനുപാതം നിലനിർത്തിക്കൊണ്ട് 2018-ൽ കാർട്ടോഗ്രാഫർമാർ തയ്യാറാക്കിയ ഈക്വൽ എർത്ത് പ്രൊജക്ഷൻ ഭൂപടമാണ് ഇതിന് പകരമായി ഉപയോഗിക്കാൻ പ്രമേയം നിർദ്ദേശിക്കുന്നത്. നീതിയുക്തമായ ഒരു ലോകം ആരംഭിക്കുന്നത് നീതിയുക്തമായ ഒരു ഭൂപടത്തിൽ നിന്നാണെന്ന് ടോഗോ വിദേശകാര്യ മന്ത്രി റോബർട്ട് ഡസ്സി വോട്ടെടുപ്പിന് മുന്നോടിയായി പ്രതികരിച്ചു. യുഎൻ പ്രമേയത്തിന് നിയമപരമായ ബാധ്യത ഇല്ലെങ്കിലും, ലോകമെമ്പാടുമുള്ള അന്താരാഷ്ട്ര സ്ഥാപനങ്ങളിലും ഡിജിറ്റൽ പ്ലാറ്റ്ഫോമുകളിലും വിവിധ രാജ്യങ്ങളിലെ ഓരോ പ്രൊവിൻസ് തലത്തിലുള്ള പാഠ്യപദ്ധതികളിലും പുതിയ മാപ്പ് വ്യാപകമായി ഉൾപ്പെടുത്താൻ ഈ നിർദ്ദേശം പ്രോത്സാഹിപ്പിക്കുന്നുണ്ട്.
അതേസമയം, ലോകസമാധാനവും മറ്റ് സുപ്രധാന നയതന്ത്ര വിഷയങ്ങളും ചർച്ച ചെയ്യേണ്ട വേദിയിൽ പതിനാറാം നൂറ്റാണ്ടിലെ മാപ്പിനെച്ചൊല്ലി അനാവശ്യമായ പ്രത്യയശാസ്ത്ര അജണ്ടകൾ നടപ്പിലാക്കുന്നു എന്ന് ആരോപിച്ചാണ് അമേരിക്ക പ്രമേയത്തെ എതിർത്തത്. എസ്റ്റോണിയ, ജോർജിയ, ലിത്വാനിയ, സെർബിയ, മോൾഡോവ, ഉക്രെയ്ൻ എന്നീ രാജ്യങ്ങളാണ് വോട്ടെടുപ്പിൽ നിന്ന് വിട്ടുനിന്നത്. ചരിത്രത്തിലെ ഏറ്റവും വലിയ തെറ്റായ വിവരങ്ങളിലൊന്നിന് ഈ യുഎൻ തീരുമാനത്തോടെ അവസാനമാകുകയാണെന്നും, ആഫ്രിക്കയുടെ ഭൂമിശാസ്ത്രപരമായ യാഥാർത്ഥ്യത്തിന് ലഭിക്കുന്ന വലിയൊരു അംഗീകാരമാണിതെന്നും കാമ്പയിന് നേതൃത്വം നൽകിയ ‘ആഫ്രിക്ക നോ ഫിൽറ്റർ’ ഉൾപ്പെടെയുള്ള സംഘടനകൾ വ്യക്തമാക്കി.
