ഹാലിഫാക്സ്, കാനഡ: കാനഡയിലെ നോവാ സ്കോഷ്യ പ്രവിശ്യയിലേക്ക് കുടിയേറ്റം സ്വപ്നം കാണുന്ന വിദേശ ഉദ്യോഗാർത്ഥികൾക്ക് തിരിച്ചടിയായി പുതിയ നിരക്ക് വർദ്ധന. പ്രൊവിൻഷ്യൽ നോമിനി പ്രോഗ്രാം (NSNP) വഴി കുടിയേറാൻ ആഗ്രഹിക്കുന്ന ഉദ്യോഗാർത്ഥികൾക്ക് നോവാ സ്കോഷ്യ പ്രവിശ്യാ ഭരണകൂടം 1,000 കനേഡിയൻ ഡോളർ അപേക്ഷാ ഫീസ് ഏർപ്പെടുത്തി. വരും സെപ്റ്റംബർ 1 മുതൽ നിലവിൽ വരുന്ന പുതിയ ഉത്തരവ് പ്രകാരം എന്റർപ്രണർ അഥവാ സംരംഭക സ്ട്രീമുകൾക്ക് 2,000 ഡോളറാണ് അപേക്ഷാ ഫീസായി നിശ്ചയിച്ചിരിക്കുന്നത്. നിലവിൽ അപേക്ഷ സമർപ്പിക്കുന്നതിന് യാതൊരുവിധ നിരക്കുകളും ഈടാക്കിയിരുന്നില്ല എന്നതിനാലാണ് ഈ മാറ്റം കുടിയേറ്റ അപേക്ഷകരെ സംബന്ധിച്ച് ഏറെ നിർണായകമാകുന്നത്.സ്കിൽഡ് വർക്കർ, നോവാ സ്കോഷ്യ ഗ്രാജുവേറ്റ്, നോവാ സ്കോഷ്യ എക്സ്പ്രസ് എൻട്രി എന്നീ പ്രധാന വർക്കർ സ്ട്രീമുകളിലാണ് ആയിരം ഡോളർ അപേക്ഷാ ഫീസ് നൽകേണ്ടത്. സെപ്റ്റംബർ ഒന്നിനോ അതിനു ശേഷമോ എക്സ്പ്രഷൻ ഓഫ് ഇന്ററസ്റ്റ് (EOI) പൂളിൽ നിന്ന് തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് മാത്രമാണ് പുതിയ നിരക്ക് ബാധകമാകുക. സെപ്റ്റംബർ ഒന്നിന് മുൻപ് അപേക്ഷാ ക്ഷണം ലഭിച്ചവർ ഈ ഫീസ് അടയ്ക്കേണ്ടതില്ല. വർക്കർ സ്ട്രീമുകളിൽ തിരഞ്ഞെടുക്കപ്പെടുന്നവർ ക്ഷണം ലഭിച്ച് ഏഴ് ദിവസത്തിനകം പൂർണ്ണ തുകയും ഓൺലൈനായി അടയ്ക്കണം. എന്റർപ്രണർ സ്ട്രീമിൽ തിരഞ്ഞെടുക്കപ്പെടുന്നവർക്ക് അപേക്ഷാ രീതിക്കനുസരിച്ച് 90 മുതൽ 180 ദിവസങ്ങൾ വരെ സമയം ലഭിക്കും. കൃത്യസമയത്ത് ഫീസ് അടച്ചില്ലെങ്കിൽ ഇവരുടെ ഇ.ഒ.ഐ പ്രൊഫൈലുകൾ റദ്ദാക്കപ്പെടും. പ്രിൻസിപ്പൽ അപേക്ഷകന് മാത്രമായിരിക്കും ഫീസ് ബാധകം; ആശ്രിതരെ ഉൾപ്പെടുത്തുന്നതിന് അധിക നിരക്ക് ഈടാക്കില്ല.ഫെഡറൽ ഗവൺമെന്റ് പ്രവിശ്യയ്ക്ക് അനുവദിച്ചു നൽകുന്ന നോമിനേഷൻ ഒഴിവുകളേക്കാൾ വളരെയധികം അപേക്ഷകർ എത്തുന്ന സാഹചര്യത്തിലാണ് നടപടിയെന്ന് നോവാ സ്കോഷ്യ അധികൃതർ വ്യക്തമാക്കി. പ്രവിശ്യയുടെ സാമ്പത്തിക തൊഴിൽ മുൻഗണനകൾക്ക് അനുസൃതമായി യോഗ്യരായ ഉദ്യോഗാർത്ഥികൾക്ക് മാത്രം അവസരം ലഭ്യമാക്കുക എന്ന ലക്ഷ്യത്തോടെയാണ് നിർദ്ദിഷ്ട തുക ഈടാക്കുന്നത്. എന്നാൽ ഇ.ഒ.ഐ സമർപ്പിക്കുന്നതിനും അറ്റ്ലാന്റിക് ഇമിഗ്രേഷൻ പ്രോഗ്രാമിനും (AIP) തുടർന്നും പ്രവിശ്യാ ഫീസ് ഉണ്ടായിരിക്കില്ല. കാനഡയിലെ ഒന്റാറിയോ, അൽബർട്ട, ബ്രിട്ടീഷ് കൊളംബിയ തുടങ്ങിയ മറ്റ് പ്രവിശ്യകൾ നിലവിൽ തന്നെ നോമിനേഷനായി ഇത്തരം ഉയർന്ന ഫീസുകൾ ഈടാക്കുന്നുണ്ട്. പ്രവിശ്യാ നോമിനേഷന് നൽകുന്ന ഈ ഫീസിന് പുറമേ, ഫെഡറൽ സ്ഥിരതാമസത്തിന് (PR) നൽകേണ്ട നിശ്ചിത തുകയും അപേക്ഷകർ വെവ്വേറെ അടയ്ക്കേണ്ടി വരും.
