മാതൃഭൂമി ബുക്സ് പ്രസിദ്ധീകരിച്ച ബാബു അബ്രഹാമിന്റെ കമ്പിളികണ്ടത്തെ കൽഭരണികൾ മലയാളത്തിൽ ഈ കാലഘട്ടത്തിൽ പുറത്തിറങ്ങിയ ഏറ്റവും ശ്രദ്ധ നേടിയ ഓർമ്മക്കുറിപ്പുകളിലൊന്നാണ്. ഇടുക്കിയിലെ കമ്പിളികണ്ടം എന്ന മലയോര ഗ്രാമത്തിൽ നിന്ന് തുടങ്ങി ഫ്രാൻസിലെ ഒരു സർവകലാശാലയിൽ അധ്യാപകനായി എത്തിയ ഒരു സാധാരണ മനുഷ്യന്റെ അതിജീവനത്തിന്റെ യാത്രയും, അതിലും പ്രധാനമായി അമ്മയായ നന്ദികുന്നേൽ മേരിയുടെ പ്രതിസന്ധികളെ പൊരുതി തോൽപ്പിക്കുവാനുള്ള മനക്കരുത്തിന്റെ കഥയും ഇതിൽ വിവരിക്കപ്പെടുന്നു. തുടക്കത്തിൽ സ്വന്തം കഥയായി എഴുതിത്തുടങ്ങിയ കൃതി പിന്നീട് അമ്മയുടെ ജീവിതകഥയായി മാറി. നിരവധി പതിപ്പുകളിലൂടെ വായനക്കാരുടെ ഇഷ്ടപുസ്തകമായി മാറിയ ഈ പുസ്തകം ഇന്ന് നൂറാം പതിപ്പിലേക്ക് നീങ്ങുന്ന ഒരു ബെസ്റ്റ് സെല്ലറാണ്.
പുസ്തകത്തിന്റെ ഉള്ളടക്കം:
പേരിലെ ‘കൽഭരണികൾ’ ബൈബിളിലെ കാനാ വിവാഹത്തിലെ കൽക്കുടങ്ങളെ ഓർമ്മിപ്പിക്കുന്നു. വെള്ളം വീഞ്ഞാക്കിയ അത്ഭുതം പോലെ, ദാരിദ്ര്യത്തിന്റെയും അപമാനത്തിന്റെയും ജീവിതത്തെ പ്രത്യാശയുടെ വീഞ്ഞാക്കിയ നാട്ടിൻപുറത്തുകാരിയായ ഒരു അമ്മയുടെ കഥയാണിത്. ഭർത്താവ് മദ്യപാനത്തിലൂടെ കുടുംബം ഉപേക്ഷിച്ചതിനു ശേഷം നാല് മക്കളുമായി ഒറ്റയ്ക്ക് ജീവിതത്തോട് പോരാടി നിലനിന്ന മേരിയുടെ ദൃഢതയും, വിശപ്പും അവഹേളനവും നിറഞ്ഞ കുട്ടിക്കാലവും, വിദ്യാഭ്യാസത്തിനായുള്ള പോരാട്ടവും ഇതിൽ വ്യക്തമായി ചിത്രീകരിക്കപ്പെടുന്നു.
പുഴുക്കൾ കിടന്ന ഗോതമ്പ് കഞ്ഞി, അനാഥശാലയിലെ ജോലി, ഹോട്ടലിൽ പാത്രം കഴുകൽ, ഫീസ് അടയ്ക്കാൻ കഴിയാത്തതിന്റെ വേദന – ഇത്തരം യാഥാർത്ഥ്യങ്ങൾ സത്യസന്ധമായി ഈ പുസ്തകത്തിൽ വിവരിക്കപ്പെടുന്നു. എന്നാൽ ഇത് വെറും ദുഃഖാവിഷ്കാരമല്ല. പ്രത്യാശയുടെയും മനുഷ്യത്വത്തിന്റെയും സന്ദേശമാണ് നൽകുന്നത്. അമ്മ പറഞ്ഞ വാക്കുകൾ – “തലയ്ക്ക് മുകളിൽ വെള്ളം വന്നാൽ അതിനും മുകളിൽ തോണി വയ്ക്കണം… തീരം എത്തിയ ശേഷം മറ്റൊരാൾക്ക് ഉപകരിക്കാൻ ആ ചങ്ങാടം വീണ്ടും വെള്ളത്തിലേക്ക് തള്ളിവിടണം” – പുസ്തകത്തിന്റെ ആത്മാവാണ്.
രചനാരീതി
ഹൃദയത്തിൽ നിന്ന് ഒഴുകുന്ന ഭാഷയിലാണ് ഈ ഓർമ്മക്കുറിപ്പ് എഴുതിയിരിക്കുന്നത്. ലളിതവും സത്യസന്ധവുമായ ഭാഷ, അതിശയോക്തിയില്ലാത്ത അവതരണം, വേദനയെ മറച്ചുവയ്ക്കാത്ത നേർക്കാഴ്ച – ഇവയെല്ലാം ശ്രദ്ധേയമാണ്. മലയോര ജീവിതത്തിന്റെ സാമൂഹിക-സാമ്പത്തിക യാഥാർത്ഥ്യങ്ങൾ, വിദ്യാഭ്യാസത്തിന്റെ പ്രാധാന്യം, മതസ്ഥാപനങ്ങളിലെ നന്മയും ദോഷവും എന്നിവ കൃത്യമായി അടയാളപ്പെടുത്തിയിരിക്കുന്നു. സ്വയം പിൻവാങ്ങി അമ്മയെ മുൻനിരയിൽ നിർത്തുന്ന രചനാരീതി ഈ പുസ്തകത്തിന്റെ എടുത്തു പറയേണ്ട പ്രത്യേകതയാണ്.
മിക്കവാറും വായനക്കാർക്ക് ഭാരമായി തോന്നും വിധം ചില ഭാഗങ്ങളിൽ വേദന അതിശയിപ്പിക്കുന്നത്ര തീവ്രമാണെങ്കിലും അതുതന്നെയാണ് ഈ കൃതിയുടെ ശക്തി – യാഥാർത്ഥ്യത്തെ മറയ്ക്കാത്ത സത്യസന്ധത.
കമ്പിളികണ്ടത്തെ കൽഭരണികൾ വെറും ഒരു ഓർമ്മപ്പുസ്തകമല്ല. അത് അതിജീവനത്തിന്റെ സാക്ഷ്യപത്രമാണ്, അമ്മയുടെ സ്നേഹത്തിന്റെയും ദൃഢതയുടെയും സ്മാരകമാണ്, പ്രത്യാശയുടെ സന്ദേശമാണ്. ജീവിതത്തിലെ ഇരുട്ടിലൂടെ കടന്നുപോകുന്നവർക്ക് വെളിച്ചം കാണിക്കുന്ന ഈ കൃതി എല്ലാവരും വായിക്കേണ്ട ഒന്നാണ്. പ്രത്യേകിച്ച് പ്രതിസന്ധികൾക്ക് മുമ്പിൽ പകച്ചുനിൽക്കുന്ന പുതുതലമുറ– പ്രതിസന്ധികളെ നേരിടുമ്പോൾ എങ്ങനെ മുന്നോട്ട് പോകാമെന്ന് പഠിപ്പിക്കുന്ന ഒരു പാഠപുസ്തകം.
ജീവിതം തുഴഞ്ഞ് നീങ്ങാൻ ധൈര്യം നൽകുന്ന ഒരു പുസ്തകം. വായിച്ചാൽ മനസ്സ് നിറയും, കണ്ണ് നനയും, എന്നാൽ ഹൃദയം ശക്തമാകും…..
